CAB. XXX

1Goan Agur mac Yakeh, eer y phadeyrys loayr y dooinney rish Ithiel, eer rish Ithiel as Ucal. 2Dy firrinagh ta mee lesh ny sloo dy hushtey na dooinney erbee, as cha vel aym keeayl dooinney. 3Cha dynsee mee creenaght, chamoo t’aym tushtey ny flaunyssee. 4Quoi t’er n’gholl seose gys niau, ny er jeet neose? quoi t’er haglym yn gheay ayns e ghurn? quoi t’er chiangley ny ushtaghyn lesh cagliagh? quoi t’er hickyraghey ooilley ardjyn y thallooin? cre’n ennym t’er, as cre’n ennym t’er e vac, my ta fys ayd? 5Ta dy chooilley ockle dy Yee slane glen: te ny scaa dauesyn ta coyrt nyn dreishteil ayn. 6Ny jean uss nhee erbee noi’n goo echeysyn, er-aggle dy der eh oghsan dhyt, as dy bee oo er dty gheddyn dty vreagerey. 7Daa red ta mee er yeearree ort; ny obb ad dou roish my voym baase. 8Scugh foddey voym fardalys as breagyn: ny cur dou edyr boghtynid ny berchys, jean mee magh lesh beaghey cooie er my hon: 9Er-aggle dy bee’m lane as dy jarrood-ym oo, gra, Quoi ta’n Chiarn? ny, er-aggle dy bee’m boght, as geid, as goaill ennym my Yee ayns fardail. 10Ny jean sharvaant y chassid gys e vainshtyr, er-aggle dy jean eh gweeaghyn dhyt, as dy bee uss ’syn aggair. 11Ta sheeloghe ayn ta gwee mollaght er nyn ayr, as nagh vel bannaghey nyn moir. 12Ta sheeloghe ayn, ta glen ayns ny sooillyn oc hene, as foast cha vel ad nieet veih nyn mroïd. 13Ta sheeloghe ayn, O cre cha ard ta ny sooillyn oc! as ferrooghyn nyn sooillyn troggit seose. 14Ta sheeloghe ayn, ta nyn veeacklyn myr cliwenyn, as nyn veeacklyn-keeill myr skynnyn, dy stroie ny boghtyn jeh’n thalloo, as ny ymmyrchee veih mastey deiney. 15Ec y ghuillag-cabbyl ta daa inneen, as ad kinjagh geam, T’ooilley, t’ooilley. Ta three reddyn ayn, nagh vel dy bragh jeant magh; dy feer, kiare nagh jir, Te dy liooar: 16Yn oaie; as yn vreïn ghennish; yn thalloo nagh vel er ny ooraghey lesh ushtey; as yn aile, nagh vel gra, Te dy liooar. 17Yn sooill ta craidey mysh e ayr, as ta gobbal biallys da e voir, nee fiee ny glionney spolgey ass eh; as nee ny urlee aegey gee eh. 18Ta three reddyn ayn ta ro ghoillee er my hon, dy jarroo kiare, nagh nhione dou. 19Raad urley ’syn aer, raad ard-nieu er creg, raad lhong ayns mean y cheayn, as raad dooinney rish ben-aeg. 20Lheid cheddin ta aght y streebagh; t’ee gee, as glenney e beeal, gra, Cha vel mee er n’yannoo olk erbee. 21Liorish three reddyn ta’n seihll er ny voirey, as yn chiarroo, nagh vel surranse daue. 22Liorish sharvaant tra t’eh reill; as liorish ommydan tra t’eh lane bee; 23Liorish ben dwoaiagh ’sy stayd phoosee, as inney-veyl ta cheet ayns ynnyd e ben-ainshtyr. 24Ta kiare cretooryn fardalagh er y thalloo, agh t’ad feer chreeney: 25Ta ny snienganyn sheeloghe feer faase, ny-yeih t’ad chymsaghey nyn meaghey ro-laue ’sy tourey; 26Cha vel ny conningyn agh sheeloghe moal, ny-yeih t’ad jannoo nyn dhieyn fo ny creggyn; 27Cha vel ree er ny locustyn, ny-yeih t’ad goll magh ayns sheshaghtyn; 28Ta’n doo-oallee dy ghoaill greme lesh e laueyn, as t’ee ayns plaaseyn reeoil. 29Ta ayn three cretooryn ta shooyl dy mie; as eer yn chiarroo ta stoamey ayns gimmeeaght: 30Yn lion s’troshey ta mastey beïyn, as nagh vel chyndaa dy lhiattee son nhee erbee: 31Yn coo, as bock ny goair, as ree er kione e heshaght-chaggee. 32My t’ou er n’yannoo dy ommijagh ayns soiaghey oo hene seose dy mooaralagh, ny my ta drogh smooinaghtyn er ve ayd, lhie dty laue er dty veeal. 33S’feer eh, dy vel eeym cheet lesh churnal bainney, as ta cassey yn stroin tayrn fuill: myr shen dy ghoostey corree te greinnaghey streeu.