CAB. XXXI

1Goan y ree Lemuel, ny raaghyn dynsee e voir da. 2Cre, my vac? cre shoh, vac my vreïn? nee shen myr te, vac my vreearraghyn? 3Ny cur dty niart da mraane, ny dty raaidyn da shen ta cur reeaghyn naardey. 4Cha vel eh son reeaghyn, O Lemuel, cha vel eh cooie da reeaghyn dy chur-rish feeyn; ny da princeyn dy ghoaill jough lajer: 5Er-aggle dy n’iu ad, as dy jarrood ad yn leigh, as dy jean ad cassey briwnys dooinney seaghnit erbee. 6Cur jough lajer dasyn ta ayns raad cherraghtyn, as feeyn dauesyn ta trome-chreeagh. 7Lhig da giu as jarrood e voghtynid, as gyn smooinaghtyn er e heaghyn ny-sodjey. 8Foshil dty veeal son y balloo, ayns y chooish ocsyn ooilley ta ry-hoi goll naardey. 9Foshil dty veeal, cur briwnys cairal, as loayr ayns cooish ny boghtyn as ymmyrchee.

10Quoi oddys ben ghreasag vie y gheddyn? son ta’n leagh eck foddey erskyn rubieyn. 11Ta cree e sheshey dy sauchey treishteil aynjee, myr shen nagh bee eh ayns aggle spooilley. 12Nee ish mie y yannoo da, as cha nee olk ooilley laghyn e bea. 13T’ee shirrey ollan as lieen, as gobbraghey dy jeidjagh lesh e laueyn. 14T’ee goll-rish lhuingys ny marchanyn, t’ee cur lh’ee beaghey veih foddey. 15T’ee girree neesht ’sy vadran, as cur nyn mee da’n vooinjer, as nyn obbyr hene da e inneenyn. 16T’ee goaill baght jeh magher as kionnaghey eh: lesh cosney e laueyn hene t’ee plantal garey-feeyney. 17T’ee cryssey seose e meeghyn dy gastey, as niartaghey e roihaghyn son obbyr. 18T’ee fakin dy vel yn chooid eck vondeishagh: cha vel y cainle eck goll ass ’syn oie. 19T’ee cur e meïr gys y fess, as ta ny laueyn eck cummal yn whuiggal. 20T’ee sheeyney magh e laue gys y voght; dy feer t’ee roshtyn magh e laueyn gys yn ymmyrchagh. 21Cha vel ee ayns aggle erbee roish y sniaghtey son y lught-thie eck: son ta ooilley yn vooinjer eck coamrit dy souyr. 22T’ee jannoo jee hene coodaghyn lhiabbee cullyrit, ta’n coamrey eck sheeidey as gorrym-jiarg. 23Ta’n sheshey eck cronnal ayns y whaiyl, tra t’eh ny hoie mastey shanstyr ny cheerey. 24T’ee jannoo aanrit keyl, as creck eh; as t’ee jannoo cosney, creck cryssyn rish ny marchanyn. 25Ta niart as ooashley yn coamrey eck; as bee gerjagh eck ayns y traa ta ry-heet. 26T’ee fosley e beeal lesh creenaght; as ayns y chengey eck ta’n leigh dy ghiastyllys. 27T’ee jeeaghyn dy mie gys raaidyn yn lught-thie eck, as cha vel ee gee yn arran nagh vel ee er chosney. 28Ta’n chloan eck girree seose, as genmys ee bannit; yn dooinney eck myrgeddin, as t’eh coyrt moylley jee: 29Shimmey inneen t’er n’yannoo dy mie; agh s’ou uss er-y-skyn oc ooilley. 30Cha vel stoamid agh son shallid, as aalid te fardail: agh ben ta goaill aggle roish y Chiarn, yiow ee shen moylley. 31Cur jeeish jeh mess e obbyr-lauee hene; as lhig da ny obbraghyn eck hene moylley y gheddyn jee ayns ny giattyn.