CAB. IV

1Eaisht-jee shiuish chloan, rish ynsagh nyn ayr, as bee-jee imneagh dy hoiggal tushtey. 2Son ta mee dy choyrt diu ynsagh mie, ny treig-jee my choyrle. 3Son va mish mac ynrycan my ayr, meen as mettey ayns shilley my vayrey. 4Dynsee eshyn mee neesht, as dooyrt eh rhym, Lhig da dty chree goaill stiagh my ghoan: freill my annaghyn, as bee oo bio. 5Jean creenaght y chosney, cosne tushtey: ny jarrood eh, as ny jean scarrey rish goan my veeal. 6Ny treig ee, as nee ish oo y choadey: bee graihagh urree, as nee ish fendeil oo. 7Ta creenaght yn ard-vannaght, shen-y-fa fow creenaght: as lesh ooilley dty chooid-seihlt jean tushtey y chosney. 8Jean mooar j’ee, as nee ish soiaghey seose oo; ver ee lh’ee oo gys ooashley, tra t’ou goaill hood ee. 9Ver ish er dty chione yn attey dy ghrayse: crown gloyroil stowys ee ort. 10Eaisht, O my vac, as gow my raaghyn hood: as bee bleeantyn dty heihll ymmodee. 11Ta mee er dty ynsagh ayns raad ny creenaght: ta mee er dty leeideil ayns cassanyn jeeragh. 12Tra t’ou shooyl, cha bee dty chesmadyn chionnit, as tra t’ou roie, cha jean oo skyrraghtyn. 13Gow greme shickyr er ynsagh, ny lhig voïd ee, cum ayd ee, son t’ee dty vioys.

14Ny jean gimmeeaght ayns cassan ny mee-chrauee, as ny jean shooyl ayns raad drogh gheiney. 15Jean chea roish, ny gow liorish, chyndaa veih, as cosne royd. 16Son cha vod ad cadley mannagh vel ad er n’yannoo olk: as ta’n cadley oc goll voue, mannagh der ad er paart dy huittym. 17Son t’ad gee arran y vee-chraueeaght, as giu feeyn y dewilys. 18Agh ta raad y vooinjer chrauee myr yn soilshey sollys, ta soilshean ny smoo as ny smoo derrey’n ard-vunlaa. 19Ta raad ny mee-chrauee myr y dorraghys; cha nhione daue cre roish t’ad dy snapperal.

20My vac, cur geill da my ghoan, croym dty chleaysh gys my raaghyn. 21Ny lhig ad ass dty hilley, freill ad ayns cree dty chree. 22Son t’ad bioys dauesyn ta dy gheddyn ad, as slaynt da’n slane callin.

23Freill arrey er dty chree lesh ard-chiarail: son magh ass shen ta cheet raaidyn y vea. 24Cur ersooyl voïd beeal foalsey, as meillyn scammyltagh cur foddey voïd. 25Lhig da dty hooillyn jeeaghyn jeeragh royd, as ferrooghyn dty hooillyn jeeaghyn dy kiart er dty hoshiaght. 26Jeeagh dy mie gys kesmadyn dty choshey, as bee shickyrys ayns ooilley dty raaidyn. 27Ny chyndaa gys y laue yesh, ny gys y laue hoshtal: scugh dty chass veih’n olk.