CAB. V

1My vac, cur tastey da my chreenaght, as croym dty chleaysh gys my ynsagh. 2Dy vod oo cur geill da coyrle vie, as dy vod dty veillyn freayll tushtey.

3Son ta meillyn y ven-oainjyr shilley, myr kere-volley, as ta’n beeal eck ny shliawn na’n ooil. 4Agh ta’n jerrey eck sharroo myr yn ullymar, gyere myr cliwe dy ghaa foyr. 5Ta ny cassyn eck goll sheese gys yn oaie: ta ny kesmadyn eck goaill greme er niurin. 6Dy dty chleayney veih smooinaghtyn er raad y vea, ta ny cassanyn ecksh camlaagagh, nagh vod oo toiggal ad. 7Eaisht-jee rhym eisht, er-y-fa shen, O shiuish my chloan, as ny scarr-jee rish goan my veeal. 8Freill dty raad foddey vo-ee, as ny tar coair dorrys y thie eck. 9Er-aggle dy der oo dty ghoo mie ayns pooar joarreeyn, as bleeantyn dty [niart] da’n vooinjer ghewil. 10Er-aggle neesht dy bee joarreeyn ayns slane soylley dty verchys, as dty chosney ayns thie joarree, 11As dy jean oo dobberan ec y jerrey, tra vees dty eill as dty chorp er shymley ersooyl, 12As dy jir oo, Kys va mee dwoaiagh er ynsagh, as kys ren my chree soiaghey beg jeh coyrle. 13As nagh dug mee biallys da coraa my ir-ynsee, as nagh ren mee my chleaysh y chroymmey dauesyn hug roym. 14Va mee faggys ayns dy chooilley olk, fenish y phobble, as y cho-chruinnaght.

15Iu ushtey ass dty haagh hene, as ushtaghyn geill ass dty hibbyr hene. 16Lhig da ny farraneyn ayd’s roie magh dy lhean, as strooanyn ushtey ayns ny straïdyn. 17Lhig daue ve ynrycan lhiat hene, as cha nee lesh joarreeyn ayns ayrn mayrt. 18Lhig da dty farrane ve bannit, as gow boggey ayns ben-phoost dty aegid. 19Lhig j’ee ve myr y feeaïh veen, as myr cretoor ennoil mygeayrt thie: lhig da ny keeaghyn ecksh oo y wooiys dy kinjagh, as gow uss taitnys dagh traa ayns y ghraih eck. 20As cre’n-fa, my vac, bee oo er dty chleayney liorish ben whuaagh, as taitnys ayd ayns oghrish oainjyr? 21Son ta raaidyn dooinney fo sooillyn y Chiarn, as t’eh cronnaghey ooilley e immeeaght.

22Nee e vee-chairys hene yn vee-chrauee y ghreimmey, as bee eh sniemmit. 23Yiow eh baase gyn ynsagh, as ayns mooadys e ommijys hed eh er-shaghryn.