CAB. VI

1My vac, my t’ou raane roish dty charrey, my t’ou er choyrt fo dty laue son joarree. 2T’ou ayns ribbey liorish goan dty veeal, t’ou goit lesh focklyn dty veeal hene. 3Jean shoh nish, my vac, as feayshil oo hene, tra t’ou er jeet fo pooar dty naboo: immee, jean oo hene y injillaghey, as jean shickyr jeh dty charrey. 4Ny cur cadley da dty hooillyn, ny saveenagh da ferrooghyn dty hooill. 5Jean oo hene y livrey, myr y feeaïh veih laue y chelgeyr, as myr ushag ass laue y ribbeyder.

6Immee gys y sniengan, uss chadlag, smooinee er ny raaidyn ecksh, as gow keeayl. 7Ish, ta fegooish leeideilagh, oaseir, ny fir-reill, 8Ta cosney e bee ’sy tourey, as dy haglym e beaghey ’syn ouyr. 9Caïd nee oo cadley, O chadleyder, cuin irrys oo ass dty chadley? 10Foast tammylt beg dy chadley, tammylt son saveenys, tammylt son filley ny laueyn dy chadley. 11Myr shen hig dty voghtynid ort, myr troailtagh, as dt’eme myr dooinney-caggee. 12Ta’n drogh-yantagh, dooinney mee-chrauee, shooyl lesh beeal cluicagh. 13T’eh meekey lesh e hooillyn, t’eh loayrt lesh e chassyn, t’eh gynsagh lesh e veïr. 14Ta foalsaght ayns e chree, t’eh shêgin er olk dy kinjagh, t’eh cur streeu er y hoshiaght. 15Shen-y-fa hig e heaghyn er doaltattym: ’sy tullogh bee eh brisht fegooish couyr.

16Ny shey reddyn shoh ta’n Chiarn feohdaghey, as ta eer yn chiaghtoo dwoaiagh da. 17Shilley moyrnagh, chengey vreagagh, as laueyn ta deayrtey yn uill neu-chyndagh. 18Cree ta geiyrt er drogh smooinaghtyn, cassyn ta bieau ayns roie gys olk. 19Feanish foalsey ta ginsh breagyn, as eshyn ta doostey anvea eddyr braaraghyn.

20My vac, freill sarey dt’ayrey, as ny treig leigh dty vayrey. 21Kiangle ad kinjagh er dty chree, as sniem ad mysh dty wannal. 22Tra t’ou shooyl, bee eh dty leeideilagh, tra t’ou dty chadley, nee eh dty choadey; as tra t’ou doostey, loayree eh rhyt. 23Son ta’n anney myr cainle, as ta’n leigh soilshey; as smaght lesh ynsagh, te raad y vea. 24Dy reayll oo veih drogh ven, veih chengey brynneragh yn oainjyr. 25Ny lhig da dty chree ve soit er yn aalid eck, as ny lhig j’ee oo y chleayney lesh ferrooghyn e sooill. 26Son liorish drogh ven ta dooinney tayrnit sheese gys boghtynid: as nee ben adultrinagh shelg son y vioys mooar-leagh. 27Vod dooinney aile y ghoaill ayns e oghrish, as gyn e eaddagh ve losht? 28Vod peccagh shooyl er smarageyn jiarg, as gyn e chassyn ve losht? 29Myr shen eshyn ta jannoo peccah rish ben e naboo: quoi-erbee vennys r’ee cha bee eh gyn-loght. 30Cha vel deiney jeeaghyn er loght y vaarliagh dy ve wheesh, my t’eh geid dy yannoo magh e êgin, tra t’eh goll neeu. 31Agh my ta briaght cheet er, nee eh lhiasaghey shiaght filley: ver eh ooilley cooid e hie. 32Agh quoi-erbee ta brishey poosey, t’eh laccal tushtey: eshyn ta dy yannoo eh, t’eh stroie yn annym echey hene. 33Lhott as scammylt nee eh geddyn: as cha bee yn oltooan echey dy leah er ny yarrood. 34Son ta eadolys eulys y dooinney: shen-y-fa cha bee eh myghinagh ayns laa yn chooilleen. 35Cha der eh geill da lhiasaghey erbee: chamoo vees eh meenit, ga dy jebbagh oo ymmodee giootyn.