CAB. VII

1My vac, freill my ghoan, as tasht seose my haraghyn mayrt. 2Freill my haraghyn as bee oo beayn: as my leigh myr clagh dty hooill. 3Kiangle ad er dty veïr, scrieu ad er glaare dty chree. 4Abbyr rish creenaght, Uss my huyr, as rish tushtey, Uss my ven-vooinjerey. 5Dy vod ad oo y reayll veih’n oainjyr veih’n streebagh ta brynneraght lesh e goan.

6Son ec uinniag my hie, yeeagh mee trooid my chasement, 7As cur-my-ner mastey yn vooinjer vee-cheeayllagh, honnick mee fud yn aegid, dooinney aeg gyn tushtey, 8Goll trooid y traïd, er-gerrey da’n corneil eck, as hie eh raad e thie. 9’Sy cho-leayrtys, ayns fastyr yn oie ghoo ghorraghey. 10As cur-my-ner haink ben ny whail, ayns coamrey strumpag, as jeh cree croutagh. 11(T’ee beealeragh as mee-reiltagh, cha vel ny cassyn eck fuirriaght ec y thie. 12Nish t’ee mooie, chelleeragh ayns ny straïdyn, as eisht ny lhie farkiaght ec dy chooilley chorneil.) 13Myr shen ghow ee greme er, as phaag ee eh, as lesh eddin daaney dooyrt ee rish, 14Ta mee er hebbal my ourallyn-shee: jiu ta mee er eeck my vreearraghyn. 15Shen-y-fa haink mee magh dty whail, dy aggindagh dy yeeaghyn er dty hon, as ta mee er dty gheddyn. 16Ta mee er hoiaghey magh my lhiabbee lesh coodaghyn tapestry, lesh postyn grainnit, lesh aanrit keyl Egypt. 17Ta mee er spreih my lhiabbee lesh myrrh, aloes, as cinnamon. 18Tar royd, lhig dooin goaill nyn saie dy ghraih, derrey’n voghrey, lhig dooin shin hene y gherjaghey lesh graih. 19Son cha vel my heshey ec y thie, t’eh er ghoaill jurnah foddey. 20T’eh er ghoaill sporran argid mârish, as hig eh dy valley ec laa pointit. 21Lesh e mooarane glare aalin hug ee er cur raad, lesh brynneraght e meillyn chossyn ee er. 22T’eh goll geiyrt urree er-y-chooyl, myr dow gys y teigh, ny myr ommydanyn gys kerraghey ny stockyn. 23Derrey bwoaillys side trooid yn aane echey, myr eean ta getlagh gys y ribbey, as nagh vel geill eck, dy vel eh soit son e bioys.

24Eaisht-jee rhym’s nish, er-y-fa shen, O shiuish my chloan, as cur-jee tastey da goan my veeal. 25Ny lhig da dty chree chyndaa gys ny raaidyn ecksh, ny gow er-shaghryn ayns ny cassanyn eck. 26Son t’ee er lhieggal, as er lhottey ymmodee deiney lajer: as shimmey’n fer trean t’er ny ve stroit lioree. 27Ta’n thie eck yn raad gys niurin, goll sheese gys shamyryn y vaaish.