CAB. VIII

1Nagh vel creenaght geamagh, as tushtey cur magh e coraa? 2T’ee shassoo er mullagh yn yrjey, rish ny raaidyn mooarey smoo taaghit. 3T’ee gyllaghey ec ny giattyn, ec cheet-stiagh yn ard-valley, ec fosley ny dorryssyn. 4Hiuish, O gheiney, ta mee geamagh, as ta my choraa gys cloan gheiney. 5O shiuish gyn tort, gow-jee creenaght: as shiuish vee-cheeayllagh bee-jee jeh cree toiggalagh. 6Eaisht-jee, son loayr-yms jeh ny cooishyn s’ooasle, as bee fosley my veillyn mysh reddyn jeeragh. 7Son loayree my veeal yn irriney, as ta mee-chairys dwoaiagh da my veillyn. 8Ta ooilley goan my veeal ayns cairys, cha vel nhee erbee camlaagagh ny cluicagh ayndoo. 9T’ad ooilley cronnal da’n toiggalagh, as jeeragh dauesyn ta geddyn tushtey. 10Gow my ynsagh roish argid, as keeayl roish yn airh s’costal. 11Son ta creenaght ny share na rubieyn; as cha vel dy chooilley nhee oddys ve er ny yeearree, dy ve soylit r’ee. 12Ta mish creenaght cummal marish keeayl; as toiggal bun raaghyn creeney. 13Te aggle y Chiarn dy chur feoh da olk: moyrn, as mooaralys, as y drogh raad, as y beeal molteyragh, ta dwoaie aym orroo. 14Mârym’s ta coyrle vie, as keeayl fondagh: mish tushtey, as mish niart. 15Liorym’s ta reeaghyn reill, as princeyn shirveish cairys. 16Liorym’s ta princeyn reill, as deiney ooasle, eer ooilley briwnyn y theihll. 17Shynney lhiam adsyn shynney lhieu mee, as adsyn hirrys mee dy leah, yiow ad mee. 18Mârym’s ta berchys as ooashley, dy feer berchys beayn, as ynrickys. 19Ta my vess ny share na airh, dy feer, na’n airh s’glenney, as my heet-stiagh roish reih argid. 20Mish y leeideilagh ayns raad yn ynrickys, ayns ny cassanyn jeeragh dy vriwnys. 21Dy choyrt cooid vie ayns eiraght dauesyn shynney lhiam, as ny tashtaghyn oc y lhieeney. 22Va mee marish y Chiarn ayns toshiaght e raaidyn, roish e obbraghyn er-dy-rieau. 23Va mee soit seose ayns pooar er dy bragh, veih’n toshiaght, ny my row’n seihll er ny chroo. 24Roish my row diunidyn ayn, va mish ayn: tra nagh row ny farraneyn ushtey er vrishey magh. 25Roish my row ny sleityn troggit; roish ny croink va mee er my ymmyrkey. 26Tra nagh row eh foast er n’yannoo yn thalloo, ny ny magheryn, ny yn ayrn syrjey jeh joan y theihll. 27Tra ren eh coamrey ny niaughyn, va mish ayns shen: tra hayrn eh combaase mysh eaghtyr y diunid: 28Tra ren eh meihaghey ny bodjallyn ’syn yrjey, as towse magh farraneyn y diunid: 29Tra hug eh da’n aarkey e oardaghey, nagh ragh ny ushtaghyn harrish e harey: tra hoie eh undinyn y thallooin: 30Eisht va mee liorish, myr co-beayn rish: as va mee e haitnys gagh-laa, goaill boggey dy kinjagh kiongoyrt rish: 31Goaill boggey ayns cummaltee yn theihll, as va my haitnys marish cloan gheiney. 32Nish er-y-fa shen, eaisht-jee rhym’s, O shiuish my chloan: son bannit t’adsyn ta freayll my raaidyn. 33Eaisht-jee rish ynsagh, as bee-jee creeney, as ny obb-jee ee. 34S’maynrey’n dooinney, ta dy my chlashtyn, ta er e arrey gagh laa ec my yiattyn, farkiaght ec essynyn my ghorrys. 35Son quoi-erbee ta dy my gheddyn, t’eh geddyn bea, as cosney foayr veih’n Chiarn. 36Agh eshyn ta jannoo peccah m’oï, t’eh jannoo aggair da’n annym echey hene: adsyn ooilley ta dwoaie oc orrym’s, shynney lhieu yn baase.