CAB. IX

1Ta creenaght er droggal thie jee hene, t’ee er chummey jee hene shiaght pillaryn. 2T’ee er varroo e beïyn, t’ee er hayrn e feeyn: t’ee myrgeddin er hoiaghey magh e boayrd. 3T’ee er choyrt magh e moidynyn, t’ee cur eam veih ynnydyn s’cronnal yn ard-valley. 4Quoi-erbee ta gyn ynsagh, lhig da chyndaa stiagh ayns shoh: er son eshyn ta gyn tushtey, t’ee gra rish; 5Tar-jee, ee-jee jeh my arran, as iu-jee jeh’n feeyn kiarit nyn gour. 6Treig-jee yn vooinjer ommijagh, as bee-jee bio: as immee-jee ayns y raad dy chreenaght. 7Eshyn ta cur oghsan da’n ghrynder, t’eh geddyn nearey da hene; as eh ta coyrlaghey yn vee-chrauee, t’eh tayrn er hene oltooan. 8Ny coyrlee yn ghannidagh, er-aggle dy der eh feoh dhyt; coyrlee yn dooinney creeney, as bee eh ayns aigney-mie rhyt. 9Ynsee dooinney creeney, as bee eh foast ny s’creeney; cur roish dooinney ynrick, as nee eh bishaghey ayns ynsagh. 10Ta aggle y Chiarn toshiaght creenaght, as dy hoiggal casherickys, ta shoh tushtey. 11Son liorym’s bee dty laghyn ymmodee, as bleeantyn dty vea er ny vishaghey. 12My t’ou creeney, bee oo creeney dhyt hene; agh my t’ou cur rish craid, oo hene surrys er y hon.

13Ta ben ommijagh ny beealerey; t’ee gyn tort, as cha vel monney keeayl eck. 14Son t’ee soie ec dorrys e thie, er stoyl ayns ynnydyn smoo taaghit yn ard-valley. 15Dy eamagh er troailtee, ta goll jeeragh er y raad. 16Quoi-erbee ta mee-hushtagh, lhig da chyndaa stiagh ayns shoh: as son eshyn ta giare-cheeayllagh, t’ee gra rish; 17S’millish ta ushtaghyn braddagh, as arran eeit dy follit, te blaystal. 18Agh cha vel fys echey dy vel ny merriu ayns shen; as dy vel ny goaldee ecksh ayns diunidyn niurin.