PSAL. CVI

1O cur-jee booise da’n Chiarn, son t’eh graysoil: as ta e vyghin farraghtyn son dy bragh.

2Quoi oddys obbraghyn ooasle y Chiarn y ockley magh: ny ooilley e voylley y hoilshaghey?

3Bannit t’adsyn ta kinjagh freayll briwnys: as jannoo cairys.

4Cooinee orrym, O Hiarn, cordail rish y foayr shen t’ou d’ymmyrkey gys dty phobble: O jeeagh orrym’s lesh dty haualtys.

5Dy voddym fakin maynrys dty chloan reiht: as boggey ’ghoaill ayns gennallys dty phobble, as booise y choyrt marish dty eiraght.

6Ta shin er n’yannoo peccah marish nyn ayraghyn: ta shin er chur rish aggair, as er ghellal dy olk.

7Cha dug nyn ayraghyn tastey da dty yindyssyn ayns Egypt, chamoo dreill ad dty vieys vooar ayns cooinaghtyn: agh v’ad mee-viallagh ec yn aarkey, dy jarroo ec y Faarkey Jiarg.

8Ny-yeih chooin eh lhieu er graih e ennym: dy voddagh eh yn phooar echey y hoilshaghey.

9Hug eh sarey da’n aarkey Jiarg myrgeddin, as ve chyrmit seose: myr shen ren eh adsyn y leeideil trooid y diunid, myr trooid yn aasagh.

10As haue eh ad veih laue ny tranlaasee: as livrey eh ad veih pooar y noid.

11As er son adsyn va chionney orroo, choodee ny ushtaghyn ad: cha row unnane oc faagit er-mayrn.

12Eisht chred adsyn e ghoan: as ghow ad arraneyn-moyllee huggeysyn.

13Agh ayns gerrit dy hraa yarrood ad ny obbraghyn echey: as cha jinnagh ad ad-hene y injillaghey gys e choyrle.

14Agh hug ad raad da yeearreeyn mee-reiltagh ayns yn aasagh: as ayns cheer gyn ushtey ren ad Jee y vrasnaghey.

15As hug eh daue nyn yeearree: as lesh shoh shangid ayns nyn anmeenyn.

16Hug ad corree er Moses neesht ayns ny cabbaneyn: as er Aaron Noo yn Chiarn.

17Myr shen doshil y thalloo, as slug eh seose Dathan: as choodee eh sheshaght Abiram.

18As ren aile brishey magh mastey’n cheshaght oc: as ren y lossey stroie ny mee-chrauee.

19Ren ad cummey dow ayns Horeb: as hug ad ooashley da’n jalloo lheït.

20Myr shoh chaghlaa ad nyn ghloyr: gys co-chaslys baagh ta gee faiyr;

21As yarrood ad Jee yn Saualtagh oc: v’er n’yannoo lheid ny reddyn mooarey ayns Egypt;

22Obbraghyn yindyssagh ayns cheer Ham: as reddyn atchimagh ec y Faarkey Jiarg.

23Er shoh dooyrt eh, dy jinnagh eh ad y stroie, er-be dy hass Moses e harvaant reiht kiongoyrt rish ayns y vrishey-magh: dy hyndaa ersooyl e yymmoose hrome, nagh jinnagh eh ad y stroie.

24Dy jarroo cha ren ad scansh jeh’n cheer eunyssagh shen: chamoo ren ad credjal e ghoan;

25Agh dirree ad magh ayns ny cabbaneyn oc; as cha ren ad geaishtagh gys coraa’n Chiarn.

26Eisht hrog eh seose e laue nyn ’oï: dy chur ad naardey ayns yn aasagh;

27Dy hilgey magh yn sluight oc mastey ny ashoonyn: as dy skeayley ad trooid ny cheeraghyn.

28Ren ad lhiantyn gys Baal-peor: as d’ee ad ourallyn ny merriu.

29Myr shoh ghreinnee ad eh gys corree lesh nyn ghrogh obbraghyn: as va’n chramp dewil nyn mast’ oc.

30Eisht hass Phinehas seose as ghow eh padjer: as myr shen scuirr y chramp.

31As va shen coontit dasyn son cairys: mastey dy chooilley heeloghe er son dy bragh.

32Hug ad corree er myrgeddin ec ushtaghyn y streeu: myr shen dy ren eh Moses y cherraghey kyndagh roosyn.

33Er-yn-oyr dy ren ad yn spyrryd echey y vrasnaghey: ayns wheesh as dy loayr eh dy siyragh lesh e veillyn.

34Chamoo stroie ad ny ashoonyn: myr ren y Chiarn ad y harey.

35Agh ren ad sheshaght rish ny ashoonyn: as dynsee ad nyn gliaghtaghyn.

36Ayns wheesh as dy dug ad ooashley da ny jallooyn oc, shoh ren chyndaa gys y toyrt-mow oc hene: dy jarroo, heb ad ny mec as ny inneenyn oc gys jouyil;

37As gheayrt ad yn uill gyn-loght; dy jarroo fuill ny mec as ny inneenyn oc: heb ad ayns ourallyn gys jallooyn Canaan; as va’n cheer fo mollaght lesh fuill.

38Myr shoh v’ad neu-ghlen lesh ny obbraghyn oc hene: as hie ad er maarderys lurg nyn yeearreeyn hene.

39Shen-y-fa va jymmoose y Chiarn er ny vrasnaghey noi e phobble: ayns wheesh as dy row dwoaie echey er e eiraght hene,

40As livrey eh ad harrish gys laue ny ashoonyn: as v’adsyn va dwoaie oc orroo ny hiarnyn harrystoo.

41Ren nyn noidyn tranlaase orroo: as v’ad fo nyn booar.

42Shimmey keayrt ren eh ad y livrey: agh dirree ad magh n’oï lesh nyn goyrleyn hene, as v’ad er nyn injillaghey son nyn olkys.

43Ny-yeih tra honnick eh nyn seaghyn: ren eh nyn accan y chlashtyn.

44Chooinee eh er e chonaant, as va chymmey echey orroo, cordail rish earroo e vyghinyn: hug eh dy jarroo orroosyn ooilley va leeideil ad ersooyl ayns cappeeys dy ve erreeishagh daue.

45Livrey uss shinyn, O Hiarn nyn Yee, as chaggil shin veih mastey ny ashoonyn: dy vod mayd booise y chur da dty Ennym casherick, as imraa gloyroil y yannoo jeh dty voylley.

46Bannit dy row yn Chiarn Jee dy Israel veih dy bragh, as seihll gyn jerrey: as lhig da ooilley’n pobble gra, Amen.