PSAL. CXII

1Bannit ta’n dooinney ta goaill aggle roish y Chiarn: ta taitnys mooar echey ayns e annaghyn.

2Bee yn sluight echey niartal er y thalloo: bee bannaght cour yn vooinjer ynrick.

3Bee berchys as palchey ayns e hie: as nee e chairys farraghtyn son dy bragh.

4Da’n dooinney crauee ta soilshey brishey magh ayns y dorraghys: t’eh myghinagh, graihagh, as cairagh.

5Ta dooinney mie erreeishagh, as coyrt er eeasaght: as nee eh e ghlare y reill lesh tushtey.

6Son cha bee eh dy bragh er ny scughey: as bee’n dooinney ynrick freilt ayns cooinaghtyn er son dy bragh.

7Cha bee eh agglagh jeh drogh naight erbee: son ta e chree shassoo shickyr, as credjal ayns y Chiarn.

8Ta e chree er ny hickyraghey, as cha vaill eh: derrey hee eh e aigney er e noidyn.

9T’eh er skeayley dy lhean, as er choyrt da ny boghtyn: as ta e chairys farraghtyn son dy bragh; bee’n ennym echey er ny hoiaghey seose lesh ooashley.

10Hee yn mee-chrauee eh, as bee eh trimshey da: nee eh snaggeraght lesh e eeacklyn, as lheïe ersooyl; nee yeearree yn vooinjer vee-chrauee cherraghtyn.