PSAL. CXIX

ALEPH.

1Bannit t’adsyn ta glen ayns y raad: as ta gimmeeaght ayns leigh yn Chiarn.

2Bannit t’adsyn ta freayll ny recortyssyn echey: as shirrey er e hon lesh ooilley nyn gree.

3Son t’adsyn nagh vel jannoo veg yn olk: gimmeeaght ayns e raaidyn.

4T’ou uss er harey shin: dy imneagh dy reayll dt’annaghyn.

5O dy beagh my raaidyn cha jeeragh shen: dy voddin dty lattyssyn y reayll!

6Myr shen cha bee’m er my choyrt gys nearey: choud’s ta mee coyrt tastey da ooilley dty annaghyn.

7Ver-ym booise dhyt lesh cree firrinagh: tra vee’m er n’ynsaghey briwnyssyn dty chairys.

8Freill-ym dty oardaghyn: O ny treig mee dy bollagh.

BETH.

9Cre’n aght nee dooinney aeg e raaidyn y reayll glen: dy jarroo liorish reill eh-hene cordail rish dty ghoo?

10Lesh ooilley my chree ta mee er hirrey er dty hon: O ny lhig dou goll er-shaghryn veih dty annaghyn.

11Dty ghoan ta mee er ollaghey cheu-sthie ayns my chree: nagh jinnin peccah dt’oï.

12Bannit t’ou uss, O Hiarn: O ynsee dou dty lattyssyn.

13Lesh my veillyn ta mee er ny ve ginsh: jeh ooilley briwnyssyn dty veeal.

14Ta taitnys wheesh er ve aym ayns raad dty leighyn: as ayns dy chooilley vonney dy verchys.

15Nee’m taggloo jeh dt’annaghyn: as ver-ym geill da dty raaidyn.

16Bee my haitnys ayns dty lattyssyn: as cha jarrood-ym dty ghoo.

GIMEL.

17O jean mie da dty harvaant: dy voddym ’ve bio as dty ghoo y reayll.

18Foshil uss my hooillyn: dy voddym fakin reddyn yindyssagh dty leigh.

19Ta mee my yoarree er y thalloo: O ny jean uss keiltyn voym dty annaghyn.

20Ta m’annym brishey magh son y ghraih feer jeean: t’eck dy kinjagh gys dt’oardaghyn.

21T’ou er choyrt oghsan da ny mooaralee: as cursit t’adsyn ooilley ta goll er-shaghryn veih dty annaghyn.

22O chyndaa voym’s nearey as oghsan: son ta mee er vreaylley dty recortyssyn.

23Ren princeyn myrgeddin soie as loayrt m’oï: agh ta dty harvaant taaghey eh-hene ayns dty lattyssyn.

24Son ta ny recortyssyn ayd’s my voggey: as my ir-choyrlee.

DALETH.

25Ta m’annym lhiantyn gys y joan: O jean uss mish y vioghey cordail rish dty ghoo.

26Ta mee er ghoaill rish my raaidyn, as t’ou uss er my chlashtyn: O ynsee dou dty lattyssyn.

27Cur orrym toiggal raad dt’annaghyn: as myr shen nee’m taggloo jeh dt’obbraghyn yindyssagh.

28Ta m’annym’s lheïe ersooyl son eer trimshey: jean m’y gherjaghey cordail rish dty ghoo.

29Scugh foddey voym yn raad dy vreagyn: as cur orrym mooar y yannoo jeh dty leigh.

30Ta mee er reih raad ny firrinys: as dty vriwnyssyn ta mee er hoiaghey kiongoyrt rhym.

31Ta mee er lhiantyn gys dty recortyssyn: O Hiarn, ny jean mish y choyrt gys nearey.

32Neem’s roie ayns raad dty annaghyn: tra t’ou uss er hoiaghey my chree ec reamys.

HE.

33Ynsee dou, O Hiarn, raad dty lattyssyn: as freill-ym eh gys y jerrey.

34Cur dou tushtey, as freill-ym dty leigh: freill-ym eh dy jarroo lesh ooilley my chree.

35Cur orrym dy immeeaght ayns cassan dt’annaghyn: son shen y raad ta my yeearree.

36Croym my chree gys dty recortyssyn: as cha nee gys saynt.

37O chyndaa ersooyl my hooillyn, nagh der ad geill da fardail: as jean mish y vioghey ayns dty raad.

38O niartee dty ghoo ayns dty harvaant: dy voddyms aggle y ghoaill royd.

39Gow ersooyl yn kerraghey ta mee goaill aggle roish: son ta dty vriwnyssyn mie.

40Cur-my-ner, ta my haitnys ayns dt’annaghyn: O jean mish y vioghey ayns dty chairys.

VAU.

41Lhig da dty vyghin ghraihagh cheet myrgeddin hym’s, O Hiarn: dy jarroo dty haualtys, cordail rish dty ghoo.

42Shen myr ver-ym ansoor da my noidyn: son ta my hreishteil ayns dty ghoo.

43O ny gow yn goo dy ynrickys dy bollagh ass my veeal: son ta my hreishteil ayns dty vriwnyssyn.

44Myr shen freill-ym dy kinjagh dty leigh: dy feer, son dy bragh as dy bragh.

45As nee’m gimmeeaght ec my reamys: son ta mee shirrey dt’annaghyn.

46Loayr-yms jeh dty recortyssyn myrgeddin, dy jarroo fenish reeaghyn: as cha jean-ym nearey ’ghoaill.

47As bee my haitnys ayns dt’annaghyn: ta mee er ve graihagh orroo.

48My laueyn neesht trog-ym seose gys dt’annaghyn, ta mee er ve graihagh orroo: as bee my smooinaghtyn dowin er dty lattyssyn.

ZAIN.

49O smooinee er dty harvaant cordail rish dty ghoo: ayn t’ou er choyrt orrym dy chur my hreishteil.

50Shoh ta dy my gherjaghey ayns my heaghyn: son ta dty ghoo er my vioghey.

51Ta mee ec ny mooaralee feer vooar ayns faghid: ny-yeih cha vel mee er skyrraghtyn veih dty leigh.

52Son chooinee mee er dty vriwnyssyn er-dyn chenn earish, O Hiarn: as va mee er my gherjaghey.

53Ta mee fo aggle atchimagh: er coontey ny mee-chrauee ta treigeil dty leigh.

54Ta dty lattyssyn er ve my arraneyn: ayns thie my yoarreeaght.

55Ta mee er smooinaghtyn er dt’ennym’s, O Hiarn, ayns earish ny hoie: as er vreayll dty leigh.

56Shoh va my gherjaghey: er-y-fa dy dreill mee dty annaghyn.

CHETH.

57Uss my eiraght, O Hiarn: ta mee er yialdyn dy reayll dty leigh.

58Ren mee my accan imlee ayns dt’enish lesh ooilley my chree: O bee myghinagh dou cordail rish dty ghoo.

59Deïe mee er my raaidyn hene gys cooinaghtyn: as hyndaa mee my chassyn gys dty recortyssyn.

60Ren mee siyr, as cha lhig mee shaghey yn traa: dy reayll dty annaghyn.

61Ta sheshaghtyn ny mee-chrauee er my roostey: agh cha vel mish er yarrood dty leigh.

62Ec y vean-oie nee’m girree dy chur booise dhyt: er coontey dty vriwnyssyn cairagh.

63Ta mee my heshey dauesyn ooilley ta goaill aggle royd: as ta freayll dty annaghyn.

64Ta’n seihll, O Hiarn, lane jeh dty vyghin: O ynsee dou dty lattyssyn.

TETH.

65O Hiarn, t’ou er ghellal dy graysoil rish dty harvaant: cordail rish dty ghoo.

66O ynsee dou toiggal as tushtey firrinagh: son ta mee er chredjal dty annaghyn.

67Roish my row mee seaghnit, hie mee er-shaghryn: agh nish ta mee er vreayll dty ghoo.

68T’ou uss mie as graysoil: O ynsee dou dty lattyssyn.

69Ta ny mooaralee er droggal breg orrym: agh freill-yms dt’annaghyn lesh ooilley my chree.

70Ta’n cree oc cha roauyr as saill: agh ta my haitnys er ve ayns dty leigh.

71S’mie te er my hon dy row mee ayns seaghyn: dy voddym gynsaghey dty lattyssyn.

72Ta leigh dty veeal ny smoo dy voggey dou: na millaghyn dy airh as argid.

JOD.

73Ta dty laueyn er my chroo as er my chummey: O cur dou tushtey, dy voddym gynsaghey dt’annaghyn.

74Bee adsyn ta goaill aggle royd, gennal tra hee ad mee: er-yn-oyr dy vel mee er choyrt my hreishteil ayns dty ghoo.

75Ta fys aym, O Hiarn, dy vel dty vriwnyssyn cairagh: as dy vel oo ayns eer ynrickys er choyrt seaghyn orrym.

76O lhig da dty chenjallys vyghinagh ve my gherjagh: cordail rish dty ghoo da dty harvaant.

77O lhig da dty vyghinyn graihagh cheet hym’s, dy voddym ve bio: son ta my voggey ayns dty leigh.

78Lhig da ny mooaralee ve coodit lesh nearey, son t’ad dy olkyssagh goll mygeayrt dy my stroie: agh neem’s smooinaghtyn dy dowin er dt’annaghyn.

79Lhig dauesyn ta goaill aggle royd, as t’er hoiggal dty recortyssyn: v’er nyn jyndaa hym’s.

80O lhig da my chree v’er ny hickyraghey ayns dty lattyssyn: nagh bee nearey orrym.

CAPH.

81Ta m’annym er ghoaill foddeeaght son dty haualtys: as ta my hreishteil mie er graih dty ghoo.

82Ta my hooillyn farkiaght dy jeean son dty ghoo: gra, O cuin nee oo mish y gherjaghey?

83Son ta mee shymlit myr crackan ayns y jaagh: ny-yeih cha vel mee jarrood dty lattyssyn.

84Cre whilleen ta laghyn dty harvaant: cuin nee oo cooilleen y ghoaill orroosyn ta jannoo tranlaase orrym?

85Ta’n sleih moyrnagh er chleiy ooigyn er my hon: nagh vel cordail rish dty leigh.

86Ta ooilley dt’annaghyn firrinagh: t’ad jannoo tranlaase orrym dy aggairagh; O bee uss my niart.

87V’ad faggys er n’yannoo kione orrym er y thalloo: agh cha hreig mee dt’annaghyn.

88O jean mish y vioghey lurg dty chenjallys-ghraihagh: as myr shen freill-ym recortyssyn dty veeal.

LAMED.

89O Hiarn, ta dty ghoo: farraghtyn son dy bragh ayns niau.

90Ta dt’irriney myrgeddin farraghtyn veih sheeloghe gys sheeloghe: t’ou er hoiaghey undin ny hooirey, as te er-mayrn.

91T’ad tannaghtyn gys y laa t’ayn jiu cordail rish dty oardagh: son ta dy chooilley nhee dy dty hirveish.

92Er-be dy row my voggey ayns dty leigh: veign er herraghtyn ayns my heaghyn.

93Cha jarrood-ym dt’annaghyn dy bragh: son lioroosyn t’ou er my vioghey.

94Ta mee lhiat’s; O saue mee: son ta mee er hirrey lurg dt’annaghyn.

95Ren ny mee-chrauee lhie ayns farkiaght er my hon dy my stroie: agh smooinee-yms er dty recortyssyn.

96Ta mee fakin dy vel jerrey er dy chooilley nhee: agh ta dty annaghyn erskyn-towse lhean.

MEM.

97Hiarn, cre’n ghraih t’aym’s er dty leigh: fey-ny-laa ta mee smooinaghtyn er dy dowin.

98T’ou uss trooid dt’annaghyn er my yannoo ny s’creeney na my noidyn: son t’ad dy kinjagh mârym.

99Ta ny smoo dy hushtey aym na t’ec my ir-ynsee: son ayns dty recortyssyn ta mee baarail my smooinaghtyn.

100Ta mee ny s’creeney na’n chenndeeaght: er-yn-oyr dy vel mee freayll dt’annaghyn.

101Ta mee er chummal my chassyn veih dy chooilley ghrogh raad: dy voddin freayll dty ghoo.

102Cha vel mee er skyrraghtyn veih dty vriwnyssyn: son t’ou dy my ynsaghey.

103O cre cha millish ta dty ghoan gys my vlass: dy jarroo, ny s’miljey na mill da my veeal!

104Trooid dt’annaghyn ta mee geddyn tushtey: shen-y-fa ta dwoaie aym er dy chooilley ghrogh raad.

NUN.

105Ta dty ghoo londeyr da my chassyn: as soilshey da my chesmadyn.

106Ta mee er vreearrey, as ta mee dy shickyr kiarit: dy reayll dty vriwnyssyn.

107Ta mee seaghnit erskyn towse: jean mish y vioghey, O Hiarn, cordail rish dty ghoo.

108Lhig da ourallyn-arryltagh my veeal uss y wooiys, O Hiarn: as ynsee dou dty vriwnyssyn.

109Ta m’annym dy kinjagh ayns my laue: ny-yeih cha vel mee jarrood dty leigh.

110Ta ny mee-chrauee er hoiaghey ribbey er my hon: agh ny-yeih cha jagh mee er-shaghryn veih dty annaghyn.

111Dty recortyssyn ta mee er hirrey myr m’eiraght son dy bragh: as cre’n-fa? t’ad eer boggey my chree.

112Ta mee er chroymmey my chree dy chooilleeney dty lattyssyn dy kinjagh: dy jarroo gys y jerrey.

SAMECH.

113Ta dwoaie aym orroosyn ta smooinaghtyn er yn olk: agh shynney lhiam dty leigh.

114T’ou uss my endeilagh as my choadey: as ta my hreishteil ayns dty ghoo.

115Ass my enish, shiuish ghrogh-yantee: freill-yms annaghyn my Yee.

116O niartee mee cordail rish dty ghoo, dy voddym ’ve beayn: as ny lhig dou tuittym giare jeh my hreishteil.

117Jean uss mish y chummal seose, as bee’m sauchey: bee my haitnys dy jarroo ayns dty lattyssyn.

118T’ou uss er choyrt fo-chosh adsyn ooilley ta cur cooyl rish dty lattyssyn: son cha vel ad smooinaghtyn agh er molteyraght.

119T’ou sheebey ersooyl ooilley mee-chrauee yn thallooin myr kesh: shen-y-fa shynney lhiam dty recortyssyn.

120Ta my eill er-creau son aggle jeed’s: as ta mee fo atchim dty vriwnyssyn.

AIN.

121Ta mee dellal ayns y chooish ta lowal as jeeragh: O ny faag mee fo pooar my hranlaasee.

122Cur er dty harvaant dy ghoaill taitnys ayns shen ny ta mie: nagh jean ny mooaralee veg yn aggair dou.

123Ta my hoilshey er vailleil lesh jeeaghyn son dty lhaynt: as son goo dty chairys.

124O dell rish dty harvaant cordail rish dty vyghin ghraihagh: as ynsee dou dty lattyssyn.

125Ta mish dty harvaant, O cur dou tushtey: dy voddym toiggal dty lattyssyn.

126Te traa dhyt, Hiarn, dy hroggal dty laue: son t’ad er choyrt naardey dty leigh.

127Son shynney lhiam dty annaghyn: erskyn airh as claghyn costal.

128Shen-y-fa ta mee cummal jeeragh ayns ooilley dty annaghyn: agh son raaidyn cammey ta slane dwoaie aym orroo ooilley.

PE.

129Ta dty recortyssyn yindyssagh: shen-y-fa ta m’annym dy reayll ad.

130Tra ta dty ghoo goll magh: te coyrt soilshey as creenaght da’n vooinjer ôney.

131Doshil mee my veeal, as ghow mee ennal: son ta my haitnys ayns dt’annaghyn.

132O jeeagh orrym, as bee myghinagh dou: myr boallagh oo jannoo roosyn ta graihagh er dt’ennym.

133Jean my chesmadyn y leeideil ayns dty ghoo: as myr shen cha vow mee-chraueeaght erbee barriaght orrym.

134O livrey mee veih tranlaase drogh gheiney: as myr shen freill-ym dt’annaghyn.

135Lhig da dt’eddin soilshean er dty harvaant: as ynsee dou dty lattyssyn.

136Ta my hooillyn shilley lesh jeïr: er-yn-oyr nagh vel deiney freayll dty leigh.

TSADDI.

137T’ou uss cairagh, O Hiarn: as ynrick ta dty vriwnyssyn.

138Ny recortyssyn t’ou uss er n’oardaghey: t’ad erskyn-towse cairagh as firrinagh.

139Ta my ghraih’s jeean er my choyrt eer naardey: son dy vel my noidyn er yarrood dty ghoan.

140Ta dty ghoo’s er ny phrowal gys y chooid sodjey: as ta graih ec dty harvaant er.

141Ta mee fardalagh, as beg er ny hoiaghey jee’m: ny-yeih cha vel mee jarrood dt’annaghyn.

142Ta’n chairys ayd’s cairys dy bragh farraghtyn: as dty leigh yn irriney.

143Ta seaghyn as trimshey er ghoaill greme orrym: ny-yeih ta my haitnys ayns dt’annaghyn.

144Ta cairys dty recortyssyn dy bragh farraghtyn: O giall dou tushtey, as bee’m bio.

KOPH.

145Ta mee geamagh lesh ooilley my chree: eaisht rhym, O Hiarn, freill-ym dty lattyssyn.

146Hood’s, dy feer ta mee geamagh: cooin lhiam, as freill-ym dty recortyssyn.

147Ec brishey’n laa ta mee geamagh hood’s: son ayns dty ghoo ta my hreishteil.

148Ta my hooillyn dooisht roish arrey ny hoie: dy voddym my hraa ’vaarail ayns dty ghoan.

149Clasht rish my choraa, O Hiarn, cordail rish dty chenjallys-ghraihagh: cur bree aynym myr boallagh oo.

150T’ad tayrn er-gerrey ta dy goanlyssagh jannoo tranlaase orrym: as t’ad foddey veih dty leigh.

151Bee uss er-gerrey ec laue, O Hiarn: son ta ooilley dty annaghyn firrinagh.

152Mychione dty annaghyn, ta fys aym foddey er-dy-henney: dy vel oo er hoiaghey ad er undin shickyr son dy bragh.

RESH.

153O smooinee er my arkys, as livrey mee: son cha vel mee jarrood dty leigh.

154Gow my chooish ayns laue as livrey mee: jean mee y vioghey cordail rish dty ghoo.

155Ta slaynt foddey voish ny mee-chrauee: son cha vel ad cur geill da dty lattyssyn.

156S’mooar ta dty vyghin, O Hiarn: jean mee y vioghey myr boallagh oo.

157Shimmey t’adsyn ta dy my voirey as jannoo tranlaase orrym: ny-yeih cha vel mish goll dy lhiattee voish dty recortyssyn.

158Te trimshey dou dy akin ny drogh-yantee: son nagh vel ad freayll dty leigh.

159Smooinee, O Hiarn, kys shynney lhiam dt’annaghyn: O jean mish y vioghey cordail rish dty chenjallys-ghraihagh.

160Ta dty ghoo’s firrinagh er-dy-rieau: ta ooilley briwnyssyn dty chairys farraghtyn son dy bragh.

SCHIN.

161Ta princeyn er n’yannoo tranlaase orrym gyn oyr: agh ta my chree shassoo ayns aggle jeh dty ghoo.

162Ta wheesh dy voggey aym jeh dty ghoo: as t’ec fer ta cosney mooarane spooilley.

163Er son breagyn, ta feoh as dwoaie aym orroo: agh shynney lhiam dty leigh.

164Shiaght keayrtyn ’sy laa ta mee dy dty voylley: er graih dty vriwnyssyn cairagh.

165S’mooar ta’n shee t’ocsyn ta graihagh er dty leigh: as cha der nhee erbee orroo eh y hreigeil.

166Hiarn, ta mee er yeeaghyn son dty haualtys slayntoil: as er n’yannoo lurg dt’annaghyn.

167Ta m’annym er vreayll dty recortyssyn: as er choyrt graih erskyn towse daue.

168Ta mee er vreayll dt’annaghyn as dty recortyssyn: son ta ooilley my raaidyn kiongoyrt rhyt.

TAU.

169Lhig da my accan cheet kiongoyrt rhyt, O Hiarn: cur dou tushtey cordail rish dty ghoo.

170Lhig da my aghin cheet gys dt’enish: livrey mee cordail rish dty ghoo.

171Nee my veillyn fockley magh dty voylley: tra t’ou er m’ynsaghey ayns dty lattyssyn.

172Dy jarroo nee my hengey’s arrane y ghoaill jeh dty ghoo: son ta ooilley dt’annaghyn cairagh.

173Lhig da dty laue cooney lhiam: son ta mee er ghoaill dty annaghyn myr reih.

174Ghow mee foddeeaght son dty haualtys slayntoil, O Hiarn: as ayns dty leigh ta my haitnys.

175O lhig da m’annym ve bio, as nee eh uss y voylley: as nee dty vriwnyssyn cooney lhiam.

176Ta mee er n’gholl er-shaghryn myr keyrrey chailjey: O cur lhiat thie dty harvaant; son cha vel mee jarrood dty annaghyn.