PSAL. CXXXII

1Hiarn, cooinee er David: as ooilley e heaghyn.

2Kys ren eh breearrey gys y Chiarn: as gialdyn casherick y yannoo da Jee Ooilley-niartal Yacob.

3Cha jig-yms fo clea my hie: chamoo hem seose gys my lhiabbee;

4Cha der-ym cadley da my hooillyn, ny saveenagh da ferrooghyn my hooill: ny cuishlinyn my ching dy ghoaill veg y fea;

5Derrey yioym magh boayl son chiamble y Chiarn: ynnyd-vaghee son Jee niartal Yacob.

6Cur-my-ner, cheayll shin jeh ec Ephratah: as hooar shin eh ayns y cheyll.

7Hem mayd stiagh ayns y chabbane-agglish echeysyn: as tuittee mayd injil er nyn ghlioonyn kiongoyrt rish stoyl e choshey.

8Trog ort, O Hiarn, gys ynnyd dt’ea: uss, as arg dty niart.

9Lhig da dty haggyrtyn ’ve coamrit lesh cairys: as lhig da dty nooghyn kiaulleeaght ’yannoo lesh boggey.

10Er graih dty harvaant Ghavid: ny chyndaa ersooyl eddin dt’Er-ooilit.

11Ta’n Chiarn er n’yannoo breearrey firrinagh da David: as cha jed eh n’oï;

12Jeh mess dty chorp: neem’s soiaghey er dty stoyl-reeoil.

13My nee dty chloan freayll my chonaant as my recortyssyn neem’s gynsaghey daue: nee’n chloan ocsyn myrgeddin soie er dty stoyl-reeoil er son dy bragh.

14Son ta’n Chiarn er ghoaill Sion myr reih dy ve ynnyd-vaghee da hene: t’eh er ghoaill taitnys aynjee.

15Shoh’n raad vee’m ec fea, son dy bragh: ayns shoh nee’m cummal, son ta mee goaill boggey ayn.

16Nee’m yn beaghey eck y vannaghey lesh bishagh: as nee’m ny boghtyn eck y yannoo magh lesh arran.

17Ny saggyrtyn eck nee’m y choamrey lesh slaynt: as gowee ny nooghyn eck boggey lesh arraneyn-moyllee.

18Shen y raad ver-ym er niart Ghavid dy vlaaghey: ta mee er n’oardaghey londeyr son my Er-ooilit.

19Er son e noidyn, nee’m adsyn y choodaghey lesh nearey: agh er hene nee’n attey echey cur magh blaa.