PSAL. CXL

1Livrey mee, O Hiarn, veih’n drogh ghooinney: as freill mee veih’n dooinney dewil;

2Ta smooinaghtyn er olk ayns nyn greeaghyn: as dy kinjagh greesaghey seose anvea.

3T’ad er shleeu nyn jengaghyn myr ard-nieu: ta pyshoon yn adder fo nyn meillyn.

4Freill mee, O Hiarn, veih laueyn ny mee-chrauee: jean m’y choadey veih ny tranlaasee, ta kiarit dy my hilgey harrish ayns my raaidyn.

5Ta ny mooaralee er hoiaghey ribbey er my hon, as er skeayley magh lieen dy lhean lesh coyrdyn: dy jarroo t’ad er hoiaghey trappyn ayns my raad.

6Dooyrt mee rish y Chiarn, She uss my Yee: eaisht rish coraa my phadjeryn, O Hiarn.

7O Hiarn Yee, uss niart my lhaynt: t’ou er choodaghey my chione ayns laa yn chaggey.

8Ny lhig da’n dooinney mee-chrauee cooilleen-aigney ’gheddyn orrym, O Hiarn: ny lhig da ny saaseyn aggairagh echey goaill toshiaght, nagh bee ad ro voyrnagh.

9Lhig da olkys nyn meillyn hene tuittym er y chione ocsyn: ta dy my hionney stiagh er dy chooilley heu.

10Lhig da smarageyn jiarg losht tuittym orroo: lhig daue ve tilgit ayns yn aile, as ayns ny ooigyn dowiney, nagh n’irree ad reesht dy bragh.

11Cha jig y feanish foalsey er y hoshiaght er y thalloo: nee olk yn dooinney tranlaasagh y helg gys e hoyrt-mow.

12Shickyr ta mee dy jean y Chiarn cooilleeney ’ghoaill ayns lieh’n voght: as dy gum eh seose cooish yn ymmyrchagh.

13Ver y dooinney ynrick myrgeddin booise da dt’Ennym: as nee’n er-cairagh tannaghtyn ayns dty hilley.