PSAL. CXLI

1Hiarn, ta mee geamagh ort, jean siyr hym: as cur geill da my choraa, tra ta mee jannoo m’accan hood.

2Lhig da my phadjer v’er ny hebbal ayns dt’enish myr yn incense: as lhig da troggal seose my laueyn ’ve myr oural yn astyr.

3Soie arrey, O Hiarn, roish my veeal: as freill dorrys my veillyn.

4O ny lhig da my chree ve er ny lhoobey gys drogh obbyr erbee: ny lhig dou raad y choyrt dou hene ayns cliaghtaghyn mee-chrauee, mâroosyn ta gobbraghey olk; er-aggle dy goym commee jeh ny t’ad goaill taitnys ayn.

5Ny sleaie lhig da deiney mie m’y cherraghey ayns aigney-mie: as oghsan y choyrt dou.

6As bee shoh myr ooil slayntoil, nagh brish my chione: nee’m padjer foast y ghoaill noi’n olkys oc.

7Lhig da ny briwnyn oc cherraghtyn ayns ynnydyn claghagh: dy vod ad clashtyn my ghoan, son t’ad millish.

8Ta ny craueyn ain ny lhie skeaylt er beeal yn oaie: ’naght myr ta fer brishey as scoltey fuygh er y thalloo.

9Agh ta my hooillyn jeeaghyn hood’s, O Hiarn Yee: aynyd’s ta my hreishteil, O ny jean m’annym y hreigeil.

10Freill mee veih’n ribbey t’ad er hoiaghey er my hon: as voish geulaghyn ny drogh-yantee.

11Lhig da ny mee-chrauee tuittym lesh y cheilley ayns ny ribbaghyn oc hene: as lhig dooys dy bragh ad y haghney.