PSAL. CXLII

1Hrog mee seose my choraa gys y Chiarn: dy jarroo, gys y Chiarn ren mee my aghin.

2Gheayrt mee magh my accan kiongoyrt rish: as hoilshee mee da my heaghyn.

3Tra va my spyrryd ayns trimshey, va sooill ayd er my chassan: ayns y raad va mee shooyl t’ad dy follit er hoiaghey ribbey er my hon.

4Yeeagh mee myrgeddin er my laue yesh: as honnick mee nagh row fer erbee yinnagh goaill rhym.

5Cha row ynnyd erbee aym dy chea huggey son sauchys: as cha row dooinney erbee ren scansh jeh my vioys.

6Deïe mee hood’s, O Hiarn, as dooyrt mee: Uss my hreishteil as my eiraght ayns cheer y sleih bio.

7Cur geill da m’accan: son dy injil ta mee er duittym.

8O livrey mee veih my hranlaasee: son t’ad ro lajer er my hon.

9Livrey m’annym ass pryssoon, dy voddym booise y choyrt da dt’Ennym: as shoh my ver oo dou, eisht nee deiney crauee taaghey my heshaght.