PSAL. CXLV

1Ver-yms ard-voylley dhyt, O Yee my Ree: as neem’s dty Ennym y vannaghey son dy bragh as dy bragh.

2Dy chooilley laa ver-ym booise dhyt: as dt’Ennym y ghloyraghey son dy bragh as dy bragh.

3S’mooar ta’n Chiarn, as yindyssagh, feeu dy v’er ny voylley: ta’n mooadys echey erskyn roshtyn nyn dushtey.

4Nee un sheeloghe dt’obbraghyn y voylley gys sheeloghe elley: as soilshee ad magh dty niart.

5Er my hon’s, loayr-ym jeh dty ooashley: dty ghloyr, dty voylley, as dt’obbraghyn yindyssagh;

6Myr shen dy jean sleih loayrt jeh niart dt’obbraghyn yindyssagh: as neem’s myrgeddin fockley magh dty phooar ooilley-niartal.

7Bee imraa er ny yannoo jeh ymmodee dty chenjallys: as gowee sleih arraneyn jeh dty chairys.

8Ta’n Chiarn graysoil as myghinagh: jeh surranse-foddey, as mieys vooar.

9Ta’n Chiarn dooie da dy chooilley ghooinney: as ta e vyghin harrish ooilley e obbraghyn.

10Ta ooilley dt’obbraghyn dy dty voylley, O Hiarn: as ta dty nooghyn cur booise dhyt.

11T’ad soilshaghey gloyr dty reeriaght: as loayrt jeh dty phooar;

12Dy vod dty phooar, dty ghloyr, as niart dty reeriaght: v’er ny hoilshaghey da deiney.

13Ta’n reeriaght ayd’s reeriaght dy bragh farraghtyn: as ta dty ard-reill er-mayrn trooid dy chooilley heeloghe.

14Ta’n Chiarn niartaghey lhieusyn ooilley ta aarloo dy huittym: as troggal seose adsyn ooilley ta ny lhie fo’n errey.

15Ta sooillyn dy chooilley chretoor farkiaght ort’s, O Hiarn: as t’ou coyrt daue nyn meaghey ayns imbagh cooie.

16T’ou fosley dty laue: as lhieeney dy chooilley nhee bio lesh palchey.

17Ta’n Chiarn cairagh ayns ooilley e raaidyn: as casherick ayns ooilley e obbraghyn.

18Ta’n Chiarn er-gerrey dauesyn ooilley ta geamagh er: dy jarroo, dauesyn ooilley ta geamagh er ayns ynrickys.

19Cooilleenee eshyn yn yeearree ocsyn ta goaill aggle roish: clynnee eh myrgeddin yn eam oc, as cooinee eh lhieu.

20Ta’n Chiarn coadey adsyn ooilley ta graihagh er: agh skeayley dy lhean ooilley ny mee-chrauee.

21Loayree my veeal jeh moylley’n Chiarn: as lhig da dy chooilley chretoor booise y choyrt da’n Ennym casherick echey son dy bragh as dy bragh.