PSAL. XXI

1Nee’n Ree boggey ’ghoaill ayns dty niart, O Hiarn: feer yennal vees eh jeh dty haualtys.

2T’ou er choyrt da yeearree e chree: as cha vel oo er n’obbal da aghin e veillyn.

3Son ver oo dasyn ro-laue bannaghtyn dy vieys: as soiaghey attey dy airh ghlen er e chione.

4Hir eh bea ort’s, as hug oo da bea liauyr: dy jarroo son dy bragh as dy bragh.

5Ta’n onnor echey mooar liorish dty haualtys: gloyr as ooashley vooar ver oo ersyn.

6Son ver uss dasyn maynrys dy bragh farraghtyn: as nee oo eh gennal lesh boggey dt’eddin.

7As cre’n-fa? son dy vel y Ree coyrt e hreishteil ayns y Chiarn: as ayns myghin yn Er smoo syrjey cha bee eh er ny scughey.

8Nee ooilley dty noidyn gennaghtyn dty laue: yiow dty laue yesh adsyn magh ta dwoaie oc ort.

9Nee oo ad y yannoo myr oghe ailagh ayns traa dty chorree: nee yn Chiarn ad y stroie ayns e yymmoose, as nee yn aile ad y choyrt mow.

10Yn rass oc ver oo ass ny fraueyn jeh’n thalloo: as yn sluight oc veih mastey cloan gheiney.

11Son chiare ad olkys dt’oï: as ghow ad ayns laue lheid y saase as nagh jarg ad y chooilleeney.

12Shen-y-fa ver oo orroosyn cooyl y choyrt: as strengyn dty vhow nee oo aarloo noi’n eddin oc.

13Bee uss, Hiarn, er dty hoiaghey seose ayns dty niart hene: myr shen nee mayd goaill arrane, as moylley ’choyrt da dty phooar.