PSAL. XXXIII

1Gow-jee boggey ayns y Chiarn, O shiuish sleih cairagh: son te feer chooie da’n sleih ynrick dy ve booisal.

2Moylley-jee yn Chiarn lesh y chlaasagh: gow-jee arraneyn-moyllee da lesh y lute, as y ghreïe-chiaull dy yeih strengyn.

3Gow-jee arrane noa gys y Chiarn: trog-jee seose nyn goraa huggeysyn ayns bingys dy jeean as lesh cree gennal.

4Son ta goo yn Chiarn firrinagh: as ooilley e obbraghyn ynrick.

5T’eh graihagh er cairys as briwnys: ta’n seihll lane jeh mieys y Chiarn.

6Liorish goo yn Chiarn va ny niaughyn er nyn groo: as ooilley ny pooaraghyn oc liorish ennal e veeal.

7T’eh chaglym ushtaghyn ny marrey cooidjagh, myr carnane: as freayll fo yn diunid vooar myr ayns thie-tashtee.

8Lhig da’n seihll ooilley aggle ’ghoaill roish y Chiarn: bee-jee er-creau roishyn, ooilley shiuish cummaltee yn thallooin.

9Son loayr eh, as ve jeant: hug eh sarey, as hass eh shickyr.

10Ta’n Chiarn coyrt bun-ry-skyn coyrle ny ashoonyn: as cur er saaseyn croutagh y phobble dy ve gyn-ymmyd, as cur shaghrynys er coyrleyn ny princeyn.

11Nee coyrle y Chiarn farraghtyn son dy bragh: as smooinaghtyn e chree veih sheeloghe gys sheeloghe.

12Bannit yn pobble ta’n Jee oc yn Chiarn Jehovah: as bannit ta’n sleih t’eh er reih son e eiraght.

13Yeeagh y Chiarn neose veih niau, as chur eh my-ner ooilley cloan gheiney: veih stoyl-reeoil e ynnyd-vaghee ta sooill echey er cummaltee yn theihll.

14T’eh cummey ooilley ny creeaghyn oc: as toiggal ooilley nyn obbraghyn.

15Cha vel ree erbee oddys v’er ny hauail liorish niart e heshaght-chaggee: chamoo ta dooinney lajer erbee er ny livrey liorish mooarane niart.

16Cha vel cabbyl coontit agh red fardalagh dy hauail dooinney: chamoo oddys eh livrey dooinney erbee liorish mooadys e niart.

17Cur-my-ner ta sooill y Chiarn orroosyn ta goaill aggle roish: as orroosyn ta coyrt nyn dreishteil ayns e vyghin;

18Dy livrey yn annym oc veih baase: as dy veaghey ad ayns earish dy ghenney.

19Ta’n annym ain dy meen er ny ve farkiaght er y Chiarn: she eshyn nyn gooney as nyn vendeilagh.

20Son gowee nyn gree boggey aynsyn: er-yn-oyr dy vel shin er hreishteil ayns e ennym casherick.

21Lhig da dty chenjallys vyghinagh, O Hiarn, ve orrin: ’naght myr ta shin cur nyn dreishteil aynyd.