PSAL. XXXVI

1Ta my chree ginsh dou olkys y vee-chrauee: nagh vel veg yn aggle dy Yee roish e hooillyn.

2Son t’eh brynneraght rish hene ayns e hilley hene: derrey vees e pheccah eajee er ny gheddyn magh.

3Ta goan e veeal neu-ynrick as lane dy oalsaght: t’eh er vaagail jeh dy ymmyrkey eh-hene dy creeney, as jeh jannoo dy mie.

4T’eh smooinaghtyn er olk er e lhiabbee, as cha vel eh er hoiaghey eh-hene ayns raad mie erbee: chamoo t’eh cur dwoaie da’n red ta olk.

5Ta dty vyghin, O Hiarn, roshtyn gys ny niaughyn: as dty ynrickys gys ny bodjallyn.

6Ta dty chairys shassoo myr ny sleityn ard: ta dty vriwnyssyn goll-rish y diunid vooar.

7Coadee uss, Hiarn, chammah dooinney as baagh; Cre cha ooasle ta dty vyghin, O Yee: as ver cloan gheiney nyn marrant fo scaa dty skianyn.

8Bee ad er nyn yannoo magh lesh palchey dty hie: as ver uss daue jough dty eunyssyn myr ass yn awin.

9Son mayrt’s ta farrane y vea: as ayns dty hoilshey nee mayd fakin soilshey.

10O sheeyn magh dty chenjallys-ghraihagh hucsyn ta coyrt enney ort: as dty chairys dauesyn ta firrinagh ayns cree.

11O ny lhig da’n chass dy voyrn cheet m’oï: as ny lhig da laue ny mee-chrauee m’y hilgey sheese.

12Shen y raad t’ad er duittym, ooilley ny ta gobbraghey mee-chairys: t’ad er nyn dilgey sheese, as cha bee bree ayndoo dy hassoo.