PSAL. XLII

1Myr ta’n feeaïh shirrey lurg ny strooanyn ushtey: myr shen ta m’annym goaill foddeeaght dty yeï’s, O Yee.

2Ta m’annym paagh son Jee, eer son y Jee bio: cuin hig-ym dy hassoo kionfenish Yee?

3Ta my yheïr er ve my veaghey laa as oie: choud as t’ad gagh laa gra rhym, Cre vel nish dty Yee?

4Nish tra ta mee smooinaghtyn er shoh, ta mee deayrtey magh my chree rhym pene: son hie mee marish y cheshaght, as hug mee lhiam adsyn mârym stiagh ayns thie Yee:

5Ayns y kiaulleeaght dy voylley as dy hoyrt-booise: mastey ny lheid as ta freaylley laa feailley.

6Cre’n-fa t’ou cha lane dy hrimshey, O m’annym: as cre’n-fa t’ou cha seaghnit cheu-sthie jee’m?

7Cur dty hreishteil ayns Jee: son ver-yms foast booise da son cooney e eddin.

8My Yee, ta m’annym seaghnit cheu-sthie jee’m: shen-y-fa neem’s cooinaghtyn ort’s mychione thalloo Yordan, as cronk beg Hermon.

9Ta diunid freggyrt gys diunid, liorish feiyr ny thooillaghyn ushtey: ta ooilley ny tonnyn as sterrymyn ayd’s er gholl harrym.

10Ta’n Chiarn er choyrt e chenjallys-ghraihagh ’sy laa: as ayns imbagh ny hoie ghow mish arrane jehsyn, as ren mee my phadjer gys y Jee jeh my vea.

11Jir-yms rish Jee my niart, Cre’n-fa t’ou er my yarrood: kys ta mee myr shoh goll trimshagh, choud as ta’n noid jannoo tranlaase orrym?

12Ta my chraueyn er nyn scarrey veih-my-cheilley myr lesh cliwe: choud as ta my noidyn ta dy my heaghney, ceau oltooanyn orrym;

13Ta shen, choud as t’ad dagh laa gra rhym: Cre vel nish yn Jee ayd?

14Cre’n-fa t’ou cha seaghnit, O m’annym: as cre hon t’ou cha anveagh cheu-sthie jee’m?

15O cur dty hreishteil ayns Jee: son ver-yms foast booise da, eh ta slaynt my eddin, as my Yee.