PSAL. XLIX

1O clasht-jee rish shoh, ooilley shiuish phobble: eaisht-jee rish ooilley shiuish ta baghey ’sy theihll.

2Ard as injil, berchagh as boght: dagh unnane ry-cheilley.

3Loayree my veeal jeh creenaght: as nee my chree smooinaghtyn er tushtey.

4Croym-ym my chleaysh gys y coraa-dorraghey: as nee’m soilshaghey my ghlare dowin er y chlaasagh.

5Cre hon yinnin aggle y ghoaill ayns ny laghyn dy olkys: tra ta olkys my voynyn cruinnaghey mee mygeayrt.

6Ta paart ta cur nyn marrant gys nyn gooid: as boggyssagh ayns earroo nyn merchys.

7Agh cha vod dooinney erbee e vraar y livrey: ny coonrey y yannoo rish Jee er e hon.

8Son haink eh gys ny smoo dy livrey nyn anmeenyn: myr shen dy nhegin da shen y aagail voish er son dy bragh;

9Ga dy beagh eh foddey bio: as gyn yn oaie y akin.

10Son t’eh fakin dy vel deiney creeney neesht geddyn baase as cherraghtyn cooidjagh: chammah as ta’n sleih neu-chreeney as ommijagh, as faagail nyn merchys da feallagh elley.

11As foast t’ad sheiltyn dy jean ny thieyn oc farraghtyn son dy bragh: as dy bee ny ynnydyn-vaghee oc er-mayrn veih sheeloghe gys sheeloghe; as t’ad genmys ny baljyn oc lurg nyn ennym hene.

12Ny-yeih, cha jean dooinney tannaghtyn foddey ayns ooashley: fakin dy vod eh ve er ny hoylaghey gys y maase ta cherraghtyn; shoh’n raad oc.

13Shoh’n ommijys oc: as ta nyn sluight moylley yn raa oc.

14T’ad lhie ’syn oaie myr kirree ta’n baase caigney orroo, as bee reill ec y sleih cairal harrystoo ’sy voghrey: hed yn aalid oc mow ayns yn oaie ass ny cummallyn oc.

15Agh nee Jee m’annym y livrey veih pooar yn oaie: son nee eh m’y ghoaill huggey hene.

16Ny gow aggle, ga dy bee fer er ny yannoo berchagh: ny my ta gloyr e hie er ny vishaghey.

17Son cha der eh lesh veg ersooyl mârish tra t’eh geddyn baase: chamoo nee e stayd vooar geiyrt er.

18Son choud’s v’eh bio, yeeagh eh er hene dy ve dooinney maynrey: as choud’s t’ou jannoo dy mie dhyt hene, loayree deiney dy mie jeed.

19Eiyree eshyn er sheeloghe e ayraghyn: as cha jean eh dy bragh soilshey y akin.

20Dooinney ta ayns ooashley as fegooish tushtey: t’eh er ny hoylaghey gys ny beïyn ta cherraghtyn.