PSAL. LI

1Jean myghin orrym, O Yee, lurg dty vieys vooar: cordail rish ymmodee dty vyghinyn cur ersooyl my loghtyn.

2Niee mee dy bollagh veih m’olkys: as glen mee veih my pheccah.

3Son ta mee goaill-rish m’oiljyn: as ta my pheccah kinjagh kiongoyrt rhym.

4Dt’oï’s dty-lomarcan ta mee er n’yannoo peccah, as er chur rish yn olk shoh ayns dty hilley: dy voddagh oo v’er dty heyrey ayns dty raa, as ynrick tra t’ou briwnys.

5Cur-my-ner va mee er my chummey ayns olkys: as ayns peccah ren my voir m’y yiennaghtyn.

6Agh cur-my-ner, t’ou shirrey firrinys ayns ny ayrnyn er cheu-sthie: as ver oo orrym toiggal creenaght dy follit.

7Nee oo mish y ghlenney lesh hyssop, as bee’m glen: nee oo m’y niee, as bee’m ny s’gilley na sniaghtey.

8Ver oo orrym clashtyn jeh boggey as gennallys: dy vod ny craueyn t’ou er vrishey boggey ’ghoaill.

9Chyndaa dt’eddin veih my pheccah: as cur ersooyl ooilley my ghrogh-yannoo.

10Croo aynym cree glen, O Yee: as jean ass-y-noa spyrryd cairagh cheu-sthie jee’m.

11Ny tilg mee ersooyl veih dt’enish: as ny gow dty Spyrryd Casherick voym.

12O cur dou reesht gerjagh dty chooney: as niartee mee lesh dty Spyrryd arryltagh.

13Eisht neem’s dty raaidyn y ynsaghey da ny mee-chrauee: as bee peccee er nyn jyndaa hood’s,

14Livrey mee veih loght-folley, O Yee, uss ta Jee my lhaynt: as nee my hengey arrane y ghoaill jeh dty chairys.

15Nee uss my veillyn y osley, O Hiarn: as nee my veeal soilshaghey magh dty voylley.

16Son cha vel oo shirrey oural, nonney yinnin dhyt eh: cha vel taitnys ayd ayns chebballyn-losht.

17Ta ourallyn Yee spyrryd seaghnit: cree brisht as arryssagh, O Yee, cha soie uss beg jeh.

18O bee uss foayroil as graysoil da Sion: trog seose voallaghyn Yerusalem.

19Eisht nee uss boggey ’ghoaill ayns yn oural dy chairys, ayns ourallyn-losht as chebballyn: eisht nee ad chebbal dew aegey er dt’altar.