PSAL. LVIII

1Vel nyn aignaghyn soit er cairys, O shiuish phobble: as vel shiu briwnys shen ta cairagh, O shiuish cloan gheiney?

2Dy jarroo ta shiu smooinaghtyn er olkys ayns nyn gree er y thalloo: as ta ny laueyn eu dellal rish mee-chraueeaght.

3Ta ny mee-chrauee frourtagh, dy jarroo veih breïn nyn mayrey: cha leah as t’ad er nyn ruggey, t’ad goll er-shaghryn, as loayrt breagyn.

4T’ad cha nieunagh as pyshoon ard-nieu: dy jarroo myr yn adder bouyr ta dooney ny cleayshyn eck;

5Ta gobbal dy eaishtagh rish bingys y chiaulleyder: lhig e haase kiaullee ’ve cha millish as saillish.

6Brish ny feeacklyn oc, O Yee, ayns nyn meeal; bwoaill craueyn-keeill ny lionyn, O Hiarn: lhig daue tuittym ersooyl myr ushtey ta roie dy tappee; as tra t’ad lhiggey nyn sideyn, lhig daue ve astyrit ass ny fraueyn.

7Lhig daue lheïe ersooyl myr crammag, as ve goll-rish mess ben ta er jeet roish y traa: as ny lhig daue fakin y ghrian.

8Ny roish ta ny pooiyt eu er ny hiow lesh drineyn: myr shen lhig da jymmoose eh y heaghney myr red ta’n vio rish.

9Gowee yn dooinney cairagh boggey tra hee eh yn kerraghey: nee eh e chesmadyn y niee ayns fuill ny mee-chrauee.

10Myr shen dy jir dooinney, Dy firrinagh ta leagh cour y sleih cairagh: gyn dooyt ta Jee ayn ta briwnys y theihll.