PSAL. LIX

1Livrey mee veih my noidyn, O Yee: jean m’y endeil vouesyn ta girree-magh m’oï.

2O livrey mee veih ny drogh-yantee: as saue mee veih ny deiney ta paagh lurg fuill.

3Son cur-my-ner, t’ad lhie farkiaght son my vioys: ta ny deiney niartal er nyn jaglym m’oï, fegooish foill ny aggair erbee voym’s, O Hiarn.

4T’ad roie as jannoo ad-hene aarloo fegooish foill erbee aynym’s: trog ort er-y-fa shen dy chooney lhiam, as cur-my-ner.

5Shass seose, O Hiarn Yee dy heshaght-chaggee flaunys, uss Yee Israel, dy ghoaill kerraghey er ooilley ny ashoonyn: as ny bee myghinagh dauesyn ta ass olkys goanlyssagh jannoo aggair.

6T’ad goll noon as noal ’syn astyr: t’ad grindee myr moddey, as roie mygeayrt trooid yn ard-valley.

7Cur-my-ner, t’ad loayrt lesh nyn meeal, as ta cliwenyn ayns nyn meillyn: son quoi ta clashtyn?

8Bee ad, O Hiarn, ayd’s ayns faghid: as nee oo garaghtee er ooilley ny ashoonyn-quaagh gys craid.

9My niart goym rish dy nee voïd’s te: son uss yn Jee dy my chemmyrk.

10Ta Jee jeeaghyn dou e vieys dy palchey: as lhiggee Jee dou my yeearree y akin er my noidyn.

11Ny marr ad, er-aggle dy jarrood my phobble eh: agh skeayl ad dy lhean mastey’n pobble, as cur sheese ad, O Hiarn, nyn vendeilagh.

12Kyndagh rish peccah nyn meeal, as goan nyn meillyn, bee ad goit ayns y voyrn oc hene: as cre’n-oyr? ta’n ghlare oc jeant jeh gweeaghyn as breagyn.

13Cur mow ad ayns dty chorree, cur mow ad, dy vod ad cherraghtyn: as toiggal dy nee Jee ta reill ayns Jacob as gys king y theihll.

14As ayns yn astyr nee ad chyndaa reesht: grindee myr moddey, as hed ad mygeayrt yn ard-valley.

15Roie-ee ad noon as noal son bee: as gowee ad dy olk rish, mannagh bee ad jeant magh.

16Er my hon’s, goym arrane jeh dty phooar, as nee’m dty vyghin y voylley dy leah ’sy voghrey: son t’ou uss er ve my choadey as my chemmyrk ayns laa my heaghyn.

17Hood’s, O my niart, goym arrane: son t’ou uss, O Yee, my chemmyrk, as my Yee vyghinagh.