PSAL. LXIII

1O Yee, uss my Yee: dy moghey nee’m dty hirrey.

2Ta m’annym paagh er dty hon, ta m’eill myrgeddin goaill foddeeaght dty yeï: ayns thalloo gennish as chirrym raad nagh vel veg yn ushtey.

3Myr shoh ta mee er yeeaghyn er dty hon ayns casherickys: dy voddin dty phooar as dty ghloyr y akin.

4Son ta dty chenjallys-ghraihagh ny share na’n vioys hene: nee my veillyn oo y voylley.

5Choud’s vee’m bio ver-ym ard-voylley dhyt er yn aght shoh: as trog-ym seose my laueyn ayns dt’ennym.

6Bee m’annym er ny yannoo magh, dy jarroo myr dy beagh eh lesh smuir as meeaylys: tra ta my veeal dy dty voylley lesh meillyn gerjoil.

7Nagh vel mee er chooinaghtyn ort’s ayns my lhiabbee: as er smooinaghtyn ort tra va mee doostey?

8Er-yn-oyr dy vel oo er ve m’er-coonee: shen-y-fa fo scaa dty skianyn goym boggey.

9Ta m’annym lhiantyn hood’s: ta dty laue yesh er my chummal seose.

10Ad shoh myrgeddin ta shirrey aggair m’annym: hed ad fo’n thalloo.

11Lhig daue tuittym er foyr y chliwe: dy vod ad ve son beaghey da shynnee.

12Agh gowee yn ree boggey ayns Jee; adsyn ooilley myrgeddin ta loo biallys dasyn, vees er nyn moylley: son bee yn beeal ocsyn ta loayrt breagyn er ny yeigh.