PSAL. LXXII

1Dy firrinagh ta Jee graihagh er Israel: dy jarroo er nyn lheid as ta jeh cree glen.

2Ny-yeih, va my chassyn faggys er n’gholl voym: va my chesmadyn er-gerrey dy skyrraghtyn.

3As cre’n-oyr? va mee seaghnit er coontey ny mee-chrauee: ta mee myrgeddin fakin drogh ’leih ayns lheid y raah.

4Son cha vel ad ayns gaue erbee jeh’n vaase: agh t’ad trean as lajer.

5Cha vel ad cheet ayns drogh haghyrt erbee myr sleih elley: chamoo t’ad er nyn gerraghey myr deiney elley.

6As shoh yn oyr dy vel ad sheidit seose lesh moyrn: as coodit harrish lesh dewlys.

7Ta ny sooillyn oc gatt lesh riurid: as t’ad jannoo dy jarroo myr sailliu.

8T’ad mhilley sleih elley, as dy mee-chrauee loayrt goan mollaghtagh: ta’n ghlare oc noi yn Er-syrjey;

9Son t’ad sheeyney magh nyn meeal noi niau: as ta’n chengey oc goll trooid y theihll.

10Shen-y-fa ta’n pobble tuittym lhieu: as cha nee beggan cosney t’ad dy hayrn ass shen.

11Twish, t’ad gra, Kys ver Jee tastey da: vel fysseree ayns yn Er-syrjey?

12Jeeagh, ad shoh ny mee-chrauee, ad shoh ta bishaghey ayns y theihll, as oc shoh ta berchys ayns nyn gummal: as dooyrt mee, Eisht ta mish er ghlenney my chree ayns fardail, as er niee my laueyn ayns ônid.

13Fey-ny-laa ta mee er ve er my cherraghey: as er my smaghtaghey dy chooilley voghrey;

14Dy jarroo, as va mee er loayrt faggys myr ren adsyn: agh cur-my-ner, veign eisht er gheyrey sheeloghe dty cloan.

15Eisht ghow mee ayns laue dy hoiggal shoh: agh ve ro ghoillee er my hon,

16Derrey hie mee stiagh ayns ynnyd casherick Yee: eisht hoig mee jerrey ny deiney shoh;

17Ta shen, Kys t’ou uss dy hoiaghey ad ayns ynnydyn shliawn: as dy hilgey ad sheese, as dy stroie ad.

18Oh, cre cha leah as t’ad goll naardey: cherraghtyn, as cheet gys jerrey agglagh!

19Dy jarroo, eer myr dreamal tra ta fer doostey: myr shen ver oo er y chaslys oc dy lheïe ersooyl ass yn ard-valley.

20Shoh myr va my chree seaghnit: as hie eh eer trooid my veeghyn.

21Cha ommijagh shen va mee, as cha mee-hushtagh: dy jarroo myr baagh kiongoyrt rhyt.

22Ny-yeih, ta mee kinjagh liort’s: son t’ou er my chummal rish my laue yesh.

23Nee oo m’y leeideil lesh dty choyrle: as ny lurg m’y ghoaill gys gloyr.

24Quoi t’aym ayns niau agh uss: as cha vel unnane erbee er y thalloo ta mee dy yeearree ayns soylaghey jeed’s.

25Ta m’eill as my chree failleil: agh ta Jee niart my chree, as my hoghyr son dy bragh.

26Son cur-my-ner, nee adsyn ta dy dty hreigeil, cherraghtyn: t’ou er stroie adsyn ooilley ta kyndagh jeh maarderys dt’oï.

27Agh te mie er my hon’s dy chummal shickyr gys Jee, dy chur my hreishteil ayns y Chiarn Jee: as dy loayrt jeh ooilley dt’obbraghyn ayns giattyn inneen Sion.