PSAL. LXXV

1Dhyt’s, O Yee, ta shin cur booise: dy jarroo dhyt’s ta shin cur booise.

2Ta dt’ennym myrgeddin cha faggys: as shen ta dt’obbraghyn yindyssagh dy hoilshaghey.

3Tra hig chaglym-cooidjagh y phobble reesht ayns m’enish: nee’m briwnys cordail rish cairys.

4Ta’n seihll annoon, as ooilley e cummaltee: mish ta gymmyrkey seose ny pillaryn eck.

5Dooyrt mee rish ny ommydanyn, Ny jean-jee cha keoi: as rish y vooinjer vee-chrauee, Ny soie-jee seose nyn eairk;

6Ny soie-jee seose nyn eairk dy ard: as ny loayr-jee lesh mwannal mooaralagh;

7Son cha vel stayd ard cheet veih’n niar, ny veih’n neear: ny foast veih’n jiass.

8As cre’n-oyr? she Jee yn briw: t’eh cur sheese fer, as soiaghey seose fer elley.

9Son ayns laue yn Chiarn ta cappan, as ta’n feeyn jiarg: te lane as seiyt, as t’eh deayrtey ass yn chooid cheddin.

10Er son y drundin echey: nee ooilley mee-chrauee y theihll ad y iu, as y yiole ass.

11Agh loayr-yms jeh Jee Yacob: as nee’m eh y voylley son dy bragh.

12Ooilley eairkyn y vooinjer vee-chrauee myrgeddin neem’s y vrishey: as bee niart y vooinjer chairagh er ny hoiaghey seose.