PSAL. LXXVIII

1Clasht-jee rish my leigh’s, O my phobble: croym-jee nyn gleayshyn gys goan my veeal’s.

2Nee’m my veeal y osley ayns coraa-dorraghey: ver-ym y bun diu jeh raaghyn doillee yn chenndeeaght;

3Ad ta shin er chlashtyn as er hoiggal: as lheid as ta nyn ayraghyn er n’insh dooin;

4Nagh jinnagh shin ad y cheiltyn veih cloan ny sheelogheyn ta ry-heet: agh dy hoilshaghey onnor y Chiarn, ny obbraghyn niartal as yindyssagh t’eh er n’yannoo.

5Ren eh conaant rish Jacob, as hug eh leigh da Israel: shen ren eh sarey nyn shenn-ayraghyn dy ynsaghey da nyn gloan;

6Dy voddagh y sluight oc toiggal ’ghoaill jeh: as y chloan nagh row foast er nyn ruggey;

7Dy voddagh adsyn tra veagh ad er n’aase seose: yn chooid cheddin y hoilshaghey da nyn gloan;

8Dy voddagh ad nyn dreishteil y choyrt ayns Jee: as gyn obbraghyn Yee y yarrood, agh ny annaghyn echeysyn y reayll.

9As gyn ve myr nyn shenn-ayraghyn, sheeloghe vee-chredjuagh as mee-viallagh: sheeloghe nagh ren nyn gree y hoiaghey dy cairagh, as y spyrryd oc cha ren lhiantyn dy shickyr gys Jee;

10Goll-rish cloan Ephraim: lurg daue ve eïllit son caggey, as cur lhieu bowaghyn, hyndaa ad nyn gooyl ayns laa yn chaggey.

11Cha dreill ad conaant Yee: as cha jinnagh ad gimmeeaght ayns e leigh;

12Agh yarrood ad ny v’eh er n’yannoo: as ny obbraghyn yindyssagh v’eh er hoilshaghey er nyn son oc.

13Reddyn mirrilagh ren eshyn ayns shilley ny shenn-ayraghyn ainyn, ayns thalloo Egypt: dy jarroo ayns magher Zoan.

14Ren eh yn aarkey y scarrey, as lhig eh daue goll ny hrooid: hug eh er ny ushtaghyn dy hassoo er mooin y cheilley [myr voall er dagh cheu.]

15Ayns y laa neesht ren eh ad y leeideil lesh bodjal: as fud-ny-hoie lesh soilshey dy aile.

16Ren eh ny creggyn creoi y scoltey ’syn aasagh: as hug eh jough daue assdoo, myr dy beagh eh ass y diunid vooar.

17Hug eh lesh ushtaghyn ass y chreg chloaie: myr shen dy vrish ad magh goll-rish ny awinyn.

18Ny-yeih son shoh as ooilley hie ad ny sodjey er nyn doshiaght ayns peccah n’oï: as ren ad yn fer smoo syrjey y vrasnaghey ’syn aasagh.

19Ren ad Jee y hrial ayns nyn greeaghyn: as hir ad bee son y taynt oc.

20Loayr ad noi Jee myrgeddin, gra: Jean Jee boayrd y chiarail nyn gour ayns yn aasagh?

21Woaill eh yn chreg chloaie dy jarroo, dy ren yn ushtey brishey magh, as dy roie eh ooilley ny strooanyn: agh vod eh arran y choyrt myrgeddin, ny feill y chiarail cour e phobble?

22Tra cheayll y Chiarn shoh, v’eh jymmoosagh: myr shen va’n aile er ny oaddey ayns Jacob, as haink jymmoose trome seose noi Israel,

23Er-y-fa nagh ren ad credjal ayns Jee: as nagh dug ad nyn dreishteil ayns e chooney.

24Myr shen ren eh ny bodjallyn heose y harey: as doshil eh dorryssyn yn aer.

25Gheayrt eh neose orroo myrgeddin frassyn dy Vanna dy ee: as hug eh beaghey daue veih niau.

26Myr shen ren dooinney bee ainleyn y ee: son hug eh daue beaghey dy liooar.

27Hug eh er y gheay-niar dy heidey fo’n aer: as trooid e phooar hug eh lesh stiagh yn gheay-neear-ass.

28Gheayrt eh feill neose orroo cha chiu as joan: as eeanlee skianagh myr geinnagh ny marrey.

29Lhig eh da tuittym mastey ny cabbaneyn oc: dy jarroo eer mygeayrt nyn gummallyn.

30Myr shen ren ad gee, as v’ad jeant magh, son hug eh daue nyn aigney hene: cha row ad giarit jeh nyn yeearree.

31Agh choud as va’n bee foast ayns nyn meeal, haink jymmoose trome Yee orroo, as varr eh yn vooinjer by-verchee jeu: dy jarroo, as woaill eh sheese ny reih deiney va ayns Israel.

32Agh son shoh as ooilley, hie ad ny sodjey er nyn doshiaght ayns peccah: as cha chred ad ny obbraghyn yindyssagh echey.

33Shen-y-fa ny laghyn oc hug eh shaghey ayns fardalys: as ny bleeantyn oc ayns seaghyn.

34Tra stroie eh ad, ren ad eh y hirrey: as hyndaa ad ad-hene dy moghey, as ren ad briaght lurg Jee.

35As chooinee ad dy nee Jee va’n niart oc: as dy row yn Jee ard nyn Ver-kionnee.

36Ny-yeih, cha ren ad agh brynneraght rish lesh nyn meeal: as foalsaght y yannoo rish lesh nyn jengey.

37Son cha row yn cree oc slane leshyn: chamoo ren ad tannaghtyn shickyr ayns e chonaant.

38Agh v’eh cha myghinagh shen dy leih eh daue nyn voiljyn: as cha ren eh ad y stroie.

39Dy jarroo, shimmey keayrt hyndaa eh e chorree ersooyl: as cha lhiggagh eh da’n slane jymmoose echey brishey magh.

40Son chooinee eh nagh row ad agh feill: as nagh row ad agh myr geay ta goll ersooyl as nagh vel cheet reesht.

41Shimmey keayrt ren ad eh y vrasnaghey ’syn aasagh: as eh y heaghney ’sy chaitnys ghennish.

42Hyndaa ad back as ren ad Jee y vrasnaghey: as ghreinnee ad yn Er Casherick ayns Israel.

43Cha smooinee ad er y laue echey: as er y laa tra ren eh ad y livrey veih laue yn noid.

44Kys v’eh er n’obbraghey e virrilyn ayns Egypt: as e yindyssyn ayns magher Zoan.

45Hyndaa eh ny ushtaghyn gys fuill: myr shen nagh dod ad giu jeh ny awinyn.

46Hug eh meeylyn ny mast’ oc, dy chur mow ad: as froggyn dy stroie ad.

47Hug eh yn vess oc da’n vraddag as yn laboraght oc da’n locust.

48Stroie eh ny biljyn-feeyney oc lesh claghyn-sniaghtee: as ny biljyn-mulberry oc lesh y rio.

49Woaill eh yn ollagh oc myrgeddin lesh claghyn-sniaghtee: as ny shioltaneyn oc lesh claghyn-taarnee.

50Hilg eh eulys e chorree orroo, farg, jymmoose, as seaghyn: as hug eh magh drogh ainleyn ny-vud oc.

51Hug eh raad da e elgys, as cha ren eh yn annym oc y haghney veih baase: agh livrey eh seose yn vioys oc gys y chramp;

52As woaill eh ooilley yn chied v’er nyn ruggey ayns Egypt: yn vooinjer b’yrjey as by-niartal ayns cummallyn Ham.

53Agh er son e phobble hene, ren eh ad y leeideil magh myr kirree: as hug eh lesh ad ’syn aasagh myr shioltane.

54Hug eh lesh ad magh dy sauchey, nagh jinnagh ad aggle y ghoaill: as vaih eh nyn noidyn lesh yn aarkey.

55As hug eh lesh ad cheu-sthie jeh cagliaghyn e ynnyd casherick: dy jarroo gys y chronk t’eshyn er chosney lesh e laue yesh.

56Hilg eh magh ny ashoonyn-quaagh myrgeddin kiongoyrt roo: hug eh er y cheer oc dy ve er ny rheynn ny mast’ oc son eiraght, as hug eh er sheelogheyn Israel dy chummal ayns ny cabbaneyn oc.

57Myr shen vrasnee ad as hug ad jymmoose er y Jee smoo ard: as cha dreill ad ny recortyssyn echey;

58Agh hyndaa ad nyn gooyl, as huitt ad ersooyl goll-rish ny shenn-ayraghyn oc: lheim ry-lhiattee myr bow brisht.

59Son ren ad eh y heaghney lesh nyn altaryn ayns ynnydyn ard: as vrasnee ad eh gys jymmoose lesh ny jallooyn oc.

60Tra cheayll Jee shoh, v’eh corree: as ghow eh jymmoose trome noi Israel;

61Myr shen dy hreig eh yn cabbane-agglish ayns Shiloh: dy jarroo yn cabbane v’eh er hoiaghey seose mastey deiney.

62Livrey eh yn phooar oc harrish gys cappeeys: as yn aalid oc gys laue yn noid.

63Livrey eh yn pobble echey myrgeddin harrish gys y chliwe: as v’eh jymmoosagh rish e eiraght.

64Ren yn aile ny deiney aegey oc y stroie: as cha row ny moidynyn oc er nyn goyrt ayns poosey.

65Va ny saggyrtyn oc er nyn stroie lesh y chliwe: as cha row mraane-treoghe erbee dy yannoo dobberan.

66Myr shen ghooisht yn Chiarn myr fer ass cadley: as myr foawr er ny niartaghey lesh feeyn;

67Woaill eh ny noidyn echey ayns ny ayrnyn cheu-chooylloo: as hug eh ad gys nearey kinjagh.

68Dob eh cabbane-agglish Yoseph: as cha ren eh reih sheeloghe Ephraim;

69Agh reih eh sheeloghe Yudah: dy jarroo cronk Sion bynney lesh.

70As ayns shen hrog eh e hiamble dy ard: as hoie eh yn undin echey, myr y thalloo t’eh er n’yannoo son eashyn.

71Reih eh myrgeddin David e harvaant: as ghow eh ersooyl eh veih ny bwoailtchyn keyrragh;

72Myr v’eh geiyrt er ny kirree trome lesh eayin, ghow eshyn eh: dy voddagh eh bochillaght Jacob e phobble, as Israel e eiraght.

73Myr shen yeeagh eh daue lesh cree ynrick as firrinagh: as reill eh ad dy tushtagh lesh ooilley e phooar.