PSAL. LXXX

1Clasht, O uss vochilley Israel, uss ta leeideil Joseph myr keyrrey: soilshee oo hene myrgeddin, uss ta dty hoie er ny cherubim.

2Kiongoyrt rish Ephraim, Benjamin, as Manasses: gleashee seose dty niart, as tar as cooin lhien.

3Chyndaa shinyn reesht, O Yee: jeeagh soilshey dt’eddin, as bee mayd slane.

4O Hiarn Yee dy heshaght-chaggee flaunys: caïd vees oo corree rish dty phobble ta goaill padjer?

5T’ou beaghey ad lesh yn arran dy yheïr: as coyrt daue palchey dy yheïr dy iu.

6T’ou uss er n’yannoo shin eer streeu da nyn naboonyn: as ta nyn noidyn garaghtee orrin gys craid.

7Chyndaa shinyn reesht, uss Yee dy heshaght-chaggee flaunys: jeeagh soilshey dt’eddin, as bee mayd slane.

8T’ou er choyrt lhiat billey-feeyney magh ass Egypt: t’ou er n’eiyrt magh ny ashoonyn-quaagh, as er hoiaghey eh.

9Ren oo ynnyd da: as tra ve er ghoaill fraue, lhieen eh yn cheer.

10Va ny croink er nyn goodaghey lesh y scaa echey: as va ny banganyn echey myr ny biljyn-cedar aalin.

11Heeyn ee magh ny banglaneyn eck gys yn aarkey: as ny banganyn eck gys yn awin.

12Cre’n-fa eisht t’ou uss er lhieggal sheese yn cleiy eck: dy vel adsyn ooilley ta goll shaghey raipey j’ee e mess?

13Ta muc feïe ass y cheyll reurey seose ny fraueyn eck: as ta maase feïe yn vagher dy chur mow ee.

14Chyndaa uss reesht, uss Yee yn cheshaght-chaggee flaunyssagh, jeeagh neose veih niau: cur-my-ner, as jeeagh er y villey-feeyney shoh;

15As er ynnyd y gharey-feeyney ta dty laue yesh er hoiaghey: as er y vanglane ren oo cha lajer er dty hon hene.

16Te er ny lostey lesh aile, as giarit sheese: as nee ad cherraghtyn ec oghsan dt’eddin.

17Lhig dty laue ve er dooinney dty laue yesh: as er mac dooinney, ren oo y yannoo cha lajer er dty hon hene;

18As myr shen cha jed mayd back voïd’s: O lhig dooin ’ve bio, as nee mayd geamagh er dt’Ennym.

19Chyndaa shin reesht, O Hiarn Yee jeh’n cheshaght-chaggee flaunyssagh: jeeagh soilshey dt’eddin, as bee mayd er nyn sauail.