PSAL. LXXXV

1Hiarn, t’ou er jeet dy ve graysoil da dty heer: t’ou er hyndaa ersooyl cappeeys Yacob.

2T’ou er leih mee-chraueeaght dty phobble: as er choodaghey ooilley nyn beccaghyn.

3T’ou er choyrt voïd ooilley dty yymmoose: as er hyndaa oo hene veih chiass dty chorree.

4Chyndaa shin reesht, O Yee nyn Saualtagh: as lhig da dty chorree scuirr voïn.

5Bee oo jymmoosagh rooin son dy bragh: as jean oo dty chorree y heeyney magh veih un sheeloghe gys sheeloghe elley?

6Nagh jean oo chyndaa reesht, as shinyn y vioghey: dy vod dty phobble boggey y ghoaill aynyd?

7Soilshee dooin dty vyghin, O Hiarn: as giall dooin dty haualtys.

8Eaisht-ym cre jir y Chiarn my-mychione’s: son nee eh shee y loayrt rish e phobble, as rish e nooghyn, nagh jyndaa ad reesht gys ommijys.

9Son ta e haualtys er-gerrey dauesyn ta goaill aggle roish: dy vod gloyr tannaghtyn ayns y cheer ain.

10Ta myghin as firrinys er choyrt quaaltys dy cheilley: ta cairys as shee er phaagey yn derrey yeh yn jeh elley.

11Nee firrinys blaaghey ass y thalloo: as ta cairys er yeeaghyn neose veih niau.

12Dy jarroo, nee yn Chiarn kenjallys-ghraihagh y hoilshaghey: as ver y cheer ain magh e mess.

13Nee cairys goll roishyn: as e immeeaght y leeideil er y raad.