PSAL. LXXXVI

1Croym dty chleaysh, O Hiarn, as clasht rhym: son ta mee boght, as ayns treihys.

2Freill uss m’annym, son ta mee ynrick: my Yee, saue dty harvaant ta coyrt e hreishteil aynyd’s.

3Bee trocoil dooys, O Hiarn: son nee’m geamagh ort’s gagh laa.

4Gerjee annym dty harvaant: son hood’s, O Hiarn, ta mee troggal seose m’annym.

5Son t’ou uss, Hiarn, mie as graysoil: as jeh myghin vooar dauesyn ooilley ta geamagh ort.

6Cur clashtyn, Hiarn, da my phadjer: as smooinee er coraa my aghin’s imlee.

7Ayns earish my heaghyn nee’m geamagh ort: son t’ou dy my chlashtyn.

8Mastey ny Jeeghyn cha vel unnane erbee casley rhyt’s, O Hiarn: cha vel unnane oddys jannoo myr t’ou uss dy yannoo.

9Hig ooilley ny ashoonyn t’ou er yannoo, as ver ad ooashley dhyt’s, O Hiarn: as nee ad dt’Ennym y ghloyraghey.

10Son t’ou uss ard, as jannoo reddyn yindyssagh: uss yn ynrycan Jee.

11Ynsee dooys dty raad, O Hiarn, as nee’m gimmeeaght ayns dt’irriney: O jean my chree y sniemmey hood, dy voddym aggle y ghoaill roish dt’Ennym.

12Ver-ym booise dhyt’s, O Hiarn my Yee, lesh ooilley my chree: as nee’m dt’Ennym y voylley son dy bragh.

13Son s’mooar ta dty vyghin hym’s: as t’ou er livrey m’annym veih diunid ny hoaie.

14O Yee, ta ny mooaralee er n’irree magh m’oï: as ta sheshaght dy ghrogh ’leih er hirrey lurg m’annym, as cha vel ad er hoiaghey uss kiongoyrt rish ny sooillyn oc.

15Agh t’ou uss, O Hiarn Yee, lane dy hymmey as dy vyghin: surranse-foddey, feoilt ayns mieys as firrinys.

16O chyndaa uss eisht hym’s, as jean myghin orrym: cur dty niart da dty harvaant, as cooin lesh mac dt’inney-veyl.

17Soilshee orrym cowrey ennagh jeh dt’oayr, dy vod adsyn ta feoh oc orrym shen y akin, as goaill nearey: er-y-fa dy vel uss, Hiarn, er chooney lhiam, as er my gherjaghey.