PSAL. LXXXVIII

1O Hiarn Yee dy my haualtys, ta mee er n’eamagh laa as oie kiongoyrt rhyt’s: O lhig da my phadjer cheet stiagh ayns yn enish ayd’s, croym dty chleaysh gys m’eam;

2Son ta m’annym lane dy heaghyn: as ta my vioys tayrn er-gerrey gys yn oaie.

3Ta mee coontit myr fer jeusyn ta goll sheese ’syn ooig: as ta mee er ve dy jarroo myr dooinney nagh vel veg y vree ayn.

4Er my scarrey mastey ny merriu, goll roosyn ta guint dy baase, as ta nyn lhie ’syn oaie: ta ass cooinaghtyn, as ta giarit ersooyl veih dty laue.

5T’ou er my choyrt ’sy lhag s’inshilley: ayns boayl dy ghorraghys, as ayns y diunid.

6Ta dty yymmoose lhie dy trome orrym: as t’ou er my heaghney lesh ooilley dty sterrymyn.

7T’ou er choyrt m’ainjys foddey voym: as er chur orrym dy ve feohdoil daue.

8Ta mee cha shickyr ayns pryssoon: nagh voddym geddyn ass.

9Ta my hoilshey gaase moal lesh eer seaghyn: Hiarn, ta mee er n’eamagh ort’s gagh laa, ta mee er heeyney magh my laueyn hood’s.

10Vel uss soilshaghey yindyssyn mastey ny merriu: ny jean ny merriu girree seose reesht, as uss y voylley?

11Bee dty chenjallys-ghraihagh er ny hoilshaghey ’syn oaie: ny dty irrinys ayns toyrt-mow?

12Bee dt’obbraghyn yindyssagh er nyn gronnaghey ’sy dorraghys: as dty chairys ’sy cheer raad ta dy chooilley nhee er ny yarrood?

13Hood’s ta mee er n’eamagh, O Hiarn: as dy moghey hig my phadjer kiongoyrt rhyt.

14Hiarn, cre’n-fa t’ou treigeil m’annym: as follaghey dt’eddin voym?

15Ta mee ayns treihys, as goll-rishyn ta raad y vaaish: dy jarroo veih m’aegid derrey nish dt’atchimyn ta mee er hurranse lesh aigney seaghnit.

16Ta dty yymmoose lhie dy trome orrym: as ta’n aggle t’orrym royd’s er my chraghey.

17Haink ad cruin mygeayrt-y-moom gagh laa myr thooilley: as ren ad m’y hionney cooidjagh er dy chooilley heu.

18My chaarjyn graihagh as my gheiney-mooinjerey t’ou er choyrt ersooyl voym: as er vollaghey m’ainjys ass my hilley.