PSAL. LXXXIX

1Bee m’arrane kinjagh jeh kenjallys-ghraihagh y Chiarn: lesh my veeal beem’s dy bragh soilshaghey dt’irriney veih un sheeloghe gys sheeloghe elley.

2Son ta mee er ghra, Bee myghin er ny hoiaghey seose son dy bragh: dt’irriney nee oo y hickyraghey ayns ny niaughyn.

3Ta mee er yannoo conaant rish my er-reiht: ta mee er vreearrey da David my harvaant;

4Dty luight’s neem’s y hickyraghey son dy bragh: as dty stoyl-reeoil y hoiaghey seose veih sheeloghe gys sheeloghe.

5O Hiarn, nee ny niaughyn hene dt’obbraghyn yindyssagh y voylley: as dt’irriney ayns sheshaght ny nooghyn.

6Son quoi eh erskyn ny bodjallyn: vees er ny hoylaghey rish y Chiarn?

7As quoi eshyn mastey ny Jeeghyn: vees casley rish y Chiarn?

8Ta aggle feer vooar dy v’er ny ghoaill roish Jee ayns chaglym-cooidjagh ny nooghyn: as ta arrym dy ve er ny choyrt da lioroosyn ooilley ta mygeayrt-y-mysh.

9O Hiarn Yee jeh sheshaght flaunys, quoi ta goll rhyt’s: ta dt’irriney, Hiarn smoo niartal, er dy chooilley heu.

10T’ou reill dewlys ny marrey: t’ou kiunaghey ny tonnyn eck tra t’ad troggal.

11T’ou er choyrt Egypt fo-chosh, as er stroie eh: t’ou er skeayley dty noidyn dy lhean lesh dty roih niartal.

12Ta ny niaughyn lhiat’s, lhiat’s myrgeddin yn thalloo: t’ou er hoiaghey undin y seihll runt, as ooilley ny t’ayn.

13T’ou er yannoo yn twoaie as y jiass: nee Tabor as Hermon boggey y ghoaill ayns dty Ennym.

14Ta roih niartal ayd: s’lajer ta dty laue’s, as ard ta dty laue yesh.

15Cairys as corrymid ta stoyl-reeoil dty ynnyd-vaghee: hed myghin as firrinys roish dt’eddin.

16Bannit ta’n pobble, O Hiarn, oddys boggey y ghoaill aynyd: nee ad gimmeeaght ayns soilshey dt’eddin.

17Bee yn taitnys oc gagh laa ayns dt’Ennym’s: as ayns dty chairys nee ad boggyssagh;

18Son uss gloyr y niart oc: as ayns dty chenjallys-ghraihagh nee oo nyn ghing y hroggal seose.

19Son ta’n Chiarn nyn vendeilagh: ta’n Er Casherick dy Israel nyn Ree.

20Loayr oo keayrt dy row ayns ashlishyn rish dty nooghyn, as dooyrt oo: Ta mee er choyrt cooney er fer ta niartal; Ta mee er hoiaghey seose fer reiht ass y pobble.

21Ta mee er gheddyn David my harvaant: lesh my ooil chasherick ta mee er n’ooilaghey eh.

22Cummee my laue eshyn dy shickyr: as nee my roih eh y niartaghey.

23Cha bee yn noid abyl tranlaase y yannoo er: cha jean mac yn olkys aggair y yannoo da.

24Bwoaill-ym sheese e noidyn kiongoyrt rish yn eddin echey: as nee’m adsyn y stroie ta feoh oc ersyn.

25Bee m’irriney neesht as my vyghin mârish: as ayns m’Ennym’s bee’n niart echey er ny hoiaghey seose.

26Soie-ym seose yn reill echey neesht er yn aarkey: as e laue yesh ayns ny thooillaghyn.

27Nee eh geamagh hym, She uss my Ayr: my Yee, as my haualtys lajer.

28As neem’s eh y yannoo my vac shinney: ny syrjey na reeaghyn y thallooin.

29Freill-ym my vyghin er e hon son dy bragh: as shassee my chonaant shickyr mârishyn.

30Ver-ym er y sluight echey myrgeddin dy arraghtyn son dy bragh: as y stoyl-reeoil echey myr laghyn niau.

31Agh my hreigys yn chloan echey my leigh: as nagh n’immee ad ayns my vriwnyssyn;

32My vrishys ad my lattyssyn, as nagh vreill ad m’annaghyn; neem’s ny foiljyn oc y cherraghey lesh y clatt, as nyn beccah lesh buillaghyn.

33Ny-yeih, my chenjallys-ghraihagh cha goym dy bollagh voish: chamoo lhiggym da m’irriney dy ailleil.

34My chonaant cha jean-ym y vrishey, ny yn red y chaghlaa t’er n’gholl magh ass my veillyn: ta mee er n’yannoo breearrey un cheayrt liorish my chasherickys, nagh vaill-ym David.

35Nee yn sluight echey tannaghtyn son dy bragh: as ta’n stoyl echey goll-rish y ghrian kiongoyrt rhym.

36Nee eh shassoo shickyr son dy bragh myr yn eayst: as myr yn feanish firrinagh ayns niau.

37Agh t’ou er chur cooyl rish as er hreigeil dt’Er-ooilit: as t’ou jymmoosagh rish.

38T’ou er vrishey conaant dty harvaant: as er hilgey yn attey echey gys y thalloo.

39T’ou er lhieggal ooilley e voallaghyn: as er vrishey sheese ny tooryn lajer echey.

40T’adsyn ooilley ta goll shaghey dy spooilley eh: as t’eh er jeet dy ve ny oltooan da e naboonyn.

41T’ou er hoiaghey seose laue yesh e noidyn: as er chur orroosyn ooilley va n’oï dy ghoaill boggey.

42T’ou er ghoaill ersooyl foyr e chliwe: as cha vel oo cur da barriaght ayns y chaggey.

43T’ou er choyrt ass e ghloyr: as er hilgey e stoyl-reeoil sheese gys y thalloo.

44Laghyn e aegid t’ou er n’yannoo giare: as er choodaghey eh lesh mee-ooashley.

45Hiarn, caïd nee uss oo hene y ollaghey, nee son dy bragh: as jean dty chorree lostey goll-rish aile?

46O cooinee cre cha giare as ta my hraa: cre’n-fa t’ou uss er n’yannoo dy chooilley ghooinney dy ve fardalagh?

47Quoi’n dooinney ta bio, nagh vaik y baase: as jean eh yn annym echey y livrey veih laue yn oaie?

48Hiarn, cre vel dty henn chenjallyssyn-graihagh: yiall oo lesh breearrey da David ayns dt’irriney?

49Cooinee, Hiarn, er yn oltooan t’ec dty harvaantyn: as kys ta mee gymmyrkey ayns m’oghrish scammyltyn ymmodee sleih;

50Lhieu ta dty noidyn er dty oltooaney; as er hilgey scammylt er kesmadyn dt’Er-ooilit: dy row yn Chiarn er ny voylley son dy bragh. Amen, as Amen.