PSAL. IX

1Ver-yms booise dhyt’s, O Hiarn, lesh ooilley my chree: loayr-ym jeh ooilley dty obbraghyn mirrilagh.

2Beem’s gennal as goym boggey aynyd’s: dy jarroo, my arraneyn nee’m y yannoo jeh dty Ennym, O Uss smoo Ard.

3Choud as ta my noidyn er nyn imman ersooyl: nee ad tuittym as cherraghtyn ec dt’enish.

4Son t’ou er vendeil my chairys as my chooish: t’ou dty hoie er stoyl-reeoil dy vriwnys cairagh.

5T’ou er choyrt oghsan da ny ashoonyn, as er stroie ny mee-chrauee: t’ou er choyrt ass yn ennym oc son dy bragh as dy bragh.

6O uss noid, ta traartyssyn er jeet gys slane jerrey: eer myr ny ard-valjyn t’ou er stroie; ta’n imraa oc er gholl naardey mâroo.

7Agh ta’n Chiarn farraghtyn son dy bragh: t’eh myrgeddin er chiarail e stoyl-reeoil son briwnys.

8Son nee eh yn seihll y vriwnys ayns cairys: as shirveish briwnys firrinagh er y pobble.

9Bee yn Chiarn neesht fendeilys dauesyn ta tranlaasit: dy jarroo kemmyrk ayns y traa cooie dy heaghyn.

10As adsyn shione daue dty Ennym, ver nyn dreishteil aynyd’s: son cha vel uss, Hiarn, rieau er hreigeil adsyn ta dy dty hirrey.

11O moylley-jee yn Chiarn ta baghey ayns Sion: soilshee-jee da’n pobble cre t’eh er n’yannoo.

12Son tra t’eh jannoo briaght son deayrtey fuill dyn loght, t’eh cooinaghtyn orroo: as cha vel eh jarrood accan ny ymmyrchee.

13Jean myghin orrym, O Hiarn; smooinee er y seaghyn ta mee er hurranse lioroosyn ta dwoaie oc orrym: uss ta dy my hroggal seose veih giattyn y vaaish;

14Dy voddym soilshaghey ooilley dty voylley cheu-sthie jeh giattyn inneen Sion: neem’s boggey ’ghoaill ayns dty haualtys.

15Ta ny ashoonyn er duittym sheese ayns yn ooig t’ad-hene er n’yannoo: ayns y ribbey cheddin dollee ad dy follit, ta’n chass oc hene er ny ghoaill.

16Ta fys ain dy vel y Chiarn cooilleeney briwnys: ta’n mee-chrauee er ny chassey ayns obbyr e laueyn hene.

17Bee ny drogh-yantee er nyn jyndaa gys niurin: as ooilley yn sleih ta jarrood Jee.

18Son cha bee’n boght dy kinjagh er ny yarrood: cha jean farkiaght surransagh ny imlee cherraghtyn son dy bragh.

19Trog ort, Hiarn, as ny lhig da dooinney laue yn eaghtyr y gheddyn: lhig da ny ashoonyn v’er nyn mriwnys ayns dty hilley.

20Cur ad ayns aggle, O Hiarn: dy vod fys ’ve ec ny ashoonyn nagh vel ad hene agh deiney.