PSAL. XC

1Hiarn, t’ou uss er ve nyn gemmyrk: veih sheeloghe gys sheeloghe.

2Roish my daink ny sleityn rish, ny rieau yn thalloo as y seihll er nyn groo: she uss Jee er-dy-rieau, as seihll gyn jerrey.

3T’ou chyndaa dooinney gys toyrt-mow: reesht t’ou gra, Tar-jee reesht, shiuish chloan gheiney:

4Son cha vel thousane bleïn ayns dty hilley’s agh myr y laa jea: fakin dy vel shen er n’gholl shaghey myr arrey ’syn oie.

5Cha leah as t’ou dyn skeayley ad, t’ad dy jarroo myr cadley: as fioghey ersooyl chelleeragh myr y faiyr.

6Ayns y voghrey te glass, as gaase seose: agh ayns yn astyr te giarit sheese, te creen as fiojit.

7Son ta shin lheïe ersooyl ayns dty yymmoose: as ta aggle orrin roish dty chorree hrome.

8T’ou er hoiaghey nyn ghrogh-yannoo kiongoyrt rhyt: as nyn beccaghyn follit ayns soilshey dt’eddin.

9Son tra t’ou uss corree, ta ooilley nyn laghyn er n’immeeaght: ta ny bleeantyn ain ec kione myr skeeal t’er ny insh.

10Ta laghyn yn eash ain three-feed bleïn as jeih: as ga dy vod deiney ’ve cha lajer as dy roshtyn kiare-feed bleïn; ny-yeih cha vel y troshid oc eisht agh deinys as trimshey; cha leah shen te er n’gholl shaghey, as ta shin goit jeh.

11Agh quoi ta toiggal pooar dty yymmoose: son dy jarroo myr ta dooinney goaill aggle, shen myr ta dty chorree.

12Ynsee dooin myr shen dy earroo nyn laghyn: dy vod ny creeaghyn ainyn ve soit er creenaght.

13Chyndaa uss reesht, O Hiarn, ec y jerrey: as bee graysoil da dty harvaantyn.

14O jean uss shin y yannoo magh lesh dty vyghin, as shen dy leah: myr shen nee mayd boggey ’ghoaill, as bee mayd gennal ooilley laghyn nyn mea.

15Gerjee shin reesht, nish lurg y traa t’ou er cherraghey shin: as son ny bleeantyn ayndoo ta shin er hurranse seaghyn.

16Soilshee dt’obbyr da dty harvaantyn: as da nyn gloan dty ghloyr.

17As dy row Ard-ooashley gloyroil y Chiarn yn Jee ain orrin: bishee uss obbyr nyn laueyn orrin, O bishee uss ny ta shin dy ghoaill ayns laue.