PSAL. XCV

1O tar-jee, lhig dooin arrane y ghoaill gys y Chiarn: lhig dooin dy creeoil boggey ’ghoaill ayns niart nyn saualtys.

2Lhig dooin cheet kiongoyrt rish yn enish echey lesh toyrt-booise: as soilshaghey shin hene gennal aynsyn lesh arraneyn-moyllee.

3Son ta’n Chiarn ny Yee mooar: as ny Ree mooar erskyn dy chooilley Yee.

4Ayns y laue echeysyn ta ooilley corneilyn y thallooin: as niart ny croink she leshyn eh myrgeddin.

5Yn faarkey she leshyn eh, as eh ren eh: as ny laueyn echeysyn ren aarloo yn thalloo chirrym.

6O tar-jee, lhig dooin ooashley y choyrt, as tuittym sheese: as gliooney kiongoyrt rish y Chiarn y Fer ren shin.

7Son eshyn y Chiarn y Jee ain: as shinyn pobble e phastyr, as kirree e laue.

8Jiu my nee shiu clashtyn e choraa, ny creoi-jee nyn greeaghyn: myr ayns y vrasnagh, as ayns laa yn violagh ayns yn aasagh;

9Tra ren ny ayraghyn eu mish y vrasnaghey: phrow ad mee, as honnick ad m’obbraghyn.

10Da-eed bleïn liauyr va mee corree rish y cheeloghe shoh, as dooyrt mee: She pobble ad ta goll er-shaghryn ayns nyn greeaghyn, son cha vel enney er ve oc er my raaidyn.

11Dauesyn loo mee ayns my chorree: nagh ragh ad stiagh ayns m’ea.