CAB. XI

1As va cuirtlagh er ny choyrt dou goll-rish lorg-howshan: as hass yn ainle, gra, Trog ort, as gow towshan jeh chiamble Yee, as yn altar, as adsyn ta coyrt ooashley ayn. 2Agh y chooyrt ta cheu-mooie jeh’n chiamble, faag voïd eh, as ny towse eh; son te er ny choyrt da ny Ashoonee: as yn ard-valley casherick stampee ad fo-chosh daa vee as da-eed. 3As ver-yms pooar da my ghaa eanish, as nee ad phadeyrys thousane daa cheead as three-feed laa coamrit ayns aanrit-sack. 4Ad shoh yn daa villey-olive, as y daa chainleyr shassoo kionfenish Jee yn theihll. 5As my nee dooinney erbee aggair daue, ta aile cheet magh ass nyn meeal, dy stroie nyn noidyn: as my nee dooinney erbee aggair daue, shoh myr vees eh er ny choyrt dy baase. 6Oc shoh ta pooar dy yeigh niau, nagh bee fliaghey ayn rish traa yn phadeyrys oc: as ta pooar oc harrish ny ushtaghyn dy hyndaa ad ayns fuill, as dy woalley yn thalloo lesh dy chooilley cherraghey, cha mennick as sailliu. 7As tra vees ad er chooilleeney nyn veanish, nee’n veisht ta girree ass y diunid gyn-grunt, caggey nyn ’oï, as yiow eh yn varriaght harrystoo, as ver eh ad dy baase. 8As nee ny kirp marroo oc lhie ayns straïd yn ard-valley vooar, ta ayns aght spyrrydoil enmyssit Sodom as Egypt, raad myrgeddin va nyn Jiarn er ny chrossey. 9As nee adsyn jeh’n pobble, as jeh ny kynneeyn, as ny glaraghyn, as ny ashoonyn, fakin ny kirp marroo oc three laa dy lieh, as cha lhig ad da ny kirp marroo oc dy ve oanluckit. 10As bee cummaltee yn thallooin boggyssagh harrystoo, as bee ad gennal, as ver ad giootyn da ’cheilley; er-yn-oyr dy ren y daa phadeyr shoh adsyn y heaghney va baghey er y thalloo. 11As lurg three laa dy lieh, hie’n Spyrryd dy vea veih Jee stiagh ayndoo: as hass ad er nyn gassyn, as huitt aggle mooar orroosyn honnick ad. 12As cheayll ad coraa ard veih niau, gra roo, Tar-jee seose gys shoh. As hie ad seose gys niau ayns bodjal, as honnick nyn noidyn ad. 13As ’syn oor cheddin va craa mooar thallooin ayn, as huitt yn jeihoo ayrn jeh’n ard-valley, as ayns y craa-thallooin v’er nyn stroie shiaght thousane dooinney: as v’adsyn va er-mayrn atchimagh, as hug ad gloyr da Jee t’ayns niau. 14Ta’n nah cherraghey harrish, as cur-my-ner, ta’n trass cheet dy tappee. 15As heid y chiaghtoo ainle, as va coraaghyn mooarey ayns niau, gra, Ta reeriaghtyn y theihll er jeet dy ve reeriaghtyn nyn Jiarn, as y Creest echey, as nee eh reill son dy bragh as dy bragh. 16As ny kiare shanstyryn as feed, va nyn soie kiongoyrt rish Jee er nyn stuill-reeoil huitt ad sheese er nyn eddinyn, as hug ad ooashley da Jee, 17Gra, Ta shin cur booise dhyt’s, O Hiarn Yee Ooilley-niartal, ta, as va, as ta ry-heet; son dy vel oo er ghoaill hood hene dty phooar vooar, as er reill. 18As va ny ashoonyn corree, as ta dty yymmoose er jeet, as traa ny merriu dy ve er nyn mriwnys, as uss dy choyrt leagh da dty harvaantyn ny phadeyryn, as da ny nooghyn, as dauesyn ta goaill aggle roish dty ennym, beg as mooar, as dy stroie adsyn ta mhilley’n seihll. 19As va chiamble Yee er ny osley ayns niau, as va arg e chonaant er ny akin ayns e hiamble: as va tendreilyn, as coraaghyn, as taarnaghyn, as craa-hallooin, as claghyn mooarey sniaghtee.