CAB. XIII

1As hass mee er genniagh ny marrey, as honnick mee beisht troggal ass yn aarkey, lesh shiaght king, as jeih eairkyn, as er e eairkyn jeih attaghyn, as er ny king echey va enmyn mollaghtagh. 2As va’n veisht honnick mee goll-rish leopard, as va ny cassyn echey myr cassyn bear, as e veeal myr beeal lion: as hug y dragon e phooar da as e stoyl, as reill mooar. 3As honnick mee unnane jeh ny king echey, myr dy beagh eh guint dy baase; as va’n lhott baaish echey er ny lheihys: as hie ooilley’n seihll ayns yindys geiyrt er y vaagh. 4As hug ad ooashley da’n dragon hug pooar da’n veisht: as hug ad ooashley da’n veisht, gra, Quoi ta goll-rish y veisht? quoi oddys caggey n’oï? 5As va beeal er ny choyrt da, loayrt reddyn mooaralagh as mollaghtagh; as va pooar echey dy hannaghtyn daa vee as da-eed. 6As doshil eh e veeal ayns goan mollaghtagh noi Jee, dy oltooaney e ennym, as e chabbane-agglish, as noi cummaltee niau. 7As va pooar er ny choyrt da dy chaggey noi ny nooghyn, as dy gheddyn yn varriaght orroo: as va pooar er ny choyrt da harrish dy chooilley chynney, as glare, as ashoon. 8As ver ooilley cummaltee yn theihll ooashley da, nyn enmyn nagh vel scruit ayns lioar bea yn Eayn er ny varroo er-dy hoshiaght y theihll. 9My ta cleaysh ec dooinney erbee, lhig da clashtyn. 10Eshyn ta leeideil gys cappeeys, hed [eh hene] gys cappeeys: Eshyn ta marroo lesh y chliwe, bee eh er ny varroo lesh y chliwe. Ayns shoh ta meenid as credjue ny nooghyn. 11As hug mee my-ner beisht elley troggal ass y thalloo, as va daa eairk echey goll-rish eayn, as loayr eh myr dragon. 12As t’eh goaill er ooilley pooar yn chied veisht va roish; as t’eh cur er y theihll, as ny cummaltee echey, dy choyrt ooashley da’n chied veisht, yn lhott baaish echey v’er ny lheihys. 13As t’eh jannoo yindyssyn mooarey, myr shen dy vel eh cur er aile dy heet neose veih’n aer er y thalloo, ayns shilley deiney, 14As t’eh molley adsyn ta cummal er y thalloo, liorish ny mirrilyn shen va pooar echey dy yannoo ayns shilley’n veisht, gra rish cummaltee’n thallooin dy yannoo jalloo da’n veisht va lhottit liorish y chliwe, as va bio. 15As va pooar echey dy choyrt bioys da jalloo yn veisht, dy jinnagh jalloo yn veisht chammah loayrt, as cur er whilleen as nagh jinnagh ooashley da jalloo yn veisht dy ve er nyn goyrt dy baase. 16As t’eh cur er ooilley chammah beg as mooar, berchagh as boght, seyr as ayns bondiaght, dy ve cowrit ayns nyn laue yesh, ny ayns glaare nyn eddin: 17As nagh voddagh dooinney erbee kionnaghey ny creck, agh eshyn va cowrey, ny ennym y veisht er, ny earroo yn ennym echey. 18Ayns shoh ta creenaght. Lhig dasyn ta tushtey echey coontey earroo yn veisht: son earroo dooinney eh; as ta’n earroo echey shey cheead three-feed as shey.