CAB. XVI

1As cheayll mee coraa ard ass y chiamble, gra rish ny shiaght ainleyn, Immee-jee as deayrt-jee magh ny siyn dy yymmoose Yee er y thalloo. 2As hie yn chied er, as gheayrt eh magh e chappan er y thalloo; as haink eh dy ve ching breinn as piandagh er ny deiney va cowrey’n veisht orroo, as orroosyn hug ooashley da’n jalloo echey. 3As ren y nah ainle e chappan y gheayrtey er yn aarkey; as haink eh dy ve myr fuill dooinney marroo: as hooar dy chooilley chretoor bio baase ’syn aarkey. 4As ren y trass ainle e chappan y gheayrtey magh er ny awinyn as farraneyn ushtey; as haink ad dy ve fuill. 5As cheayll mee ainle ny hushtaghyn gra, T’ou uss cairagh, O Hiarn, ta, as va, as vees, er-yn-oyr dy vel oo myr shoh er vriwnys: 6Son t’ad er gheayrtey fuill nooghyn as phadeyryn, as t’ou er choyrt daue fuill dy iu; son shen t’ad dy hoilliu. 7As cheayll mee fer elley gra veih’n altar, Eer myr shen, Hiarn Yee Ooilley-niartal, firrinagh as cairagh ta dty vriwnyssyn. 8As ren y chiarroo ainle e chappan y gheayrtey er y ghrian; as va pooar er ny choyrt da dy lostey deiney lesh aile. 9As va deiney losht lesh y chiass mooar, as loayr ad dy mollaghtagh noi ennym Yee, echey ta pooar harrish ny briwnyssyn trome shoh: as cha ghow ad arrys, dy chur gloyr da. 10As gheayrt y wheiggoo ainle e chappan er stoyl y veisht; as va e reeriaght lane dy ghorraghys, as ren ad caigney ny chengaghyn oc son pian; 11As doltooan ad Jee niau, ayns nyn angaish as nyn jingyn, as cha row arrys orroo son nyn obbraghyn. 12As gheayrt y cheyoo ainle e chappan er awin vooar Euphrates; as va e ushtey chyrmit seose, dy voddagh raad ve jeant aarloo da reeaghyn y shiar. 13As honnick mee three spyrrydyn neu-ghlen goll-rish froggyn cheet magh ass beeal y dragon, as magh ass beeal y veisht, as magh ass beeal y phadeyr foalsey. 14Son spyrrydyn jouyil ad gobbraghey mirrilyn, ta goll magh gys reeaghyn y thallooin, as ooilley’n seihll, dy haglym ad gys caggey yn laa mooar shen jeh’n Ooilley-niartal Jee. 15Cur-my-ner, ta mee cheet myr maarliagh. Bannit t’eshyn ta er e arrey, as freayll e gharmadyn, nagh jed eh rooisht, as dy vaik ad e nearey. 16As ren eh ad y haglym cooidjagh gys ynnyd enmyssit ayns Hebrew, Armageddon. 17As gheayrt y chiaghtoo ainle e chappan ’syn aer; as haink coraa mooar magh veih chiamble niau, veih’n stoyl-reeoil, gra, Te harrish. 18As va coraaghyn, as taarnaghyn, as tendreilyn; as va craa mooar thallooin, lheid as nagh row rieau neayr’s va sheelnaue er ny chroo, lheid y chraa-thallooin mooar as atchimagh. 19As va’n ard-valley mooar scart ayns three ayrnyn, as va ard-valjyn ny Hashoonee er nyn lhieggal: as haink ard-valley mooar Vabylon ayns cooinaghtyn fenish Yee, dy choyrt jee yn cappan feeyney jeh dewilys e yymmoose. 20As ren dy chooilley ellan chea ersooyl, as cha row ny sleityn ry-gheddyn. 21As huitt er deiney claghyn-sniaghtee mooar garroo veih niau, dy chooilley chlagh mysh trimmid talent: as ren deiney Jee y oltooaney er coontey kerraghey’n sniaghtey-garroo; son va’n chragh ren eh erskyn-towse trome.