CAB. XVII

1As haink fer jeh ny shiaght ainleyn va ny shiaght cappanyn oc, as ren eh taggloo rhym, gra, Tar ayns shoh, as jeeagh-ym dhyt briwnys yn streebagh vooar, ta ny soie er ymmodee ushtaghyn: 2Mâree ta reeaghyn y theihll er n’yannoo maarderys, as ta cummaltee ny hooirey er ve er-meshtey lesh feeyn e maarderys. 3Er shen hug eh lesh mee liorish y spyrryd gys yn aasagh: as honnick mee ben ny soie er baagh scarleod, lane dy enmyn mollaghtagh, lesh shiaght king, as jeih eairkyn. 4As va’n ven coamrit lesh purple, as scarleod, as soit magh dy stoamey lesh airh, as jewellyn costal, as pearlyn, lesh cappan airh ayns e laue, lane dy eajeeys, as broïd e maarderys. 5As er glaare yn eddin eck va ennym scruit, FOLLIAGHT, YN BABYLON MOOAR, MOIR STREEBEEYN AS REDDYN FEOHDOIL Y THEIHLL. 6As honnick mee yn ven er-meshtey lesh fuill ny nooghyn, as lesh fuill feanishyn Yeesey: as tra honnick mee ee, ghow mee yindys erskyn towse. 7As dooyrt yn ainle rhym, Cre’n-fa ghow oo yindys? Insh-ym dhyt folliaght y ven as y baagh t’ee markiagh er, echey ta ny shiaght king as ny jeih eairkyn. 8Yn veisht honnick oo, ta, as cha vel eh; as hed eh seose ass y diunid gyn-grunt, as hed eh gys toyrt-mow: as gowee cummaltee’n thallooin yindys (ny enmyn oc nagh row scruit ayns lioar y vea er-dy hoshiaght y theihll) tra ver ad my-ner yn veisht va, as nagh vel, as foast ta. 9As ayns shoh ta’n aigney ta creenaght ayn. Ta ny shiaght king shiaght croink, orroo ta’n ven ny soie. 10As ta ayn shiaght reeaghyn: ta queig er duittym, as ta fer shassoo, as cha vel y chiaghtoo foast er jeet; as tra hig eh shoh, shegin da tannaghtyn son earish ghiare. 11As y veisht va, as nagh vel, t’eh shoh dy jarroo yn hoghtoo, as t’eh jeh’n chiaght, as goll dys toyrt-mow. 12As ta ny jeih eairkyn honnick oo, jeih reeaghyn, nagh vel foast er gheddyn reeriaght erbee; agh t’ad er gheddyn pooar myr reeaghyn son un oor marish y veisht. 13T’ad shoh jeh’n un aigney, as livreyee ad nyn booar as nyn niart da’n veisht. 14Nee ad shoh caggey noi yn Eayn as yiow’n Eayn barriaght orroo: son t’eshyn Chiarn dy hiarnyn, as Ree dy reeaghyn; as t’adsyn ta leshyn, er nyn eam, er nyn reih, as firrinagh. 15As dooyrt eh rhym, Ta ny ushtaghyn honnick oo, raad ta’n streebagh ny soie, pobble, as earrooyn mooarey, as ashoonyn, as glaraghyn. 16As ver ny jeih eairkyn honnick oo er y veisht, dwoaie da’n streebagh, as ver ad mow ee, as rooishtee ad ee, as nee ad gee yn eill eck, as loshtee ad ee lesh aile. 17Son ta Jee er choyrt eh ayns ny creeaghyn oc dy chooilleeney e aigney, as dy choardail, as dy choyrt nyn reeriaght da’n veisht, derrey vees goan Yee er nyn gooilleeney. 18As ta’n ven shen honnick oo, yn ard-valley mooar shen ta reill harrish reeaghyn ny hooirey.