CAB. XVIII

1As lurg ny reddyn shoh honnick mee ainle elley cheet neose veih niau, lesh pooar niartal; as va’n seihll er ny hoilshean lesh e ghloyr. 2As deïe eh dy niartal lesh coraa lajer, gra, Ta’n Babylon yn ard-valley mooar er duittym, er duittym, as er jeet dy ve ynnyd-vaghee dy youyil, as cummal dy chooilley spyrryd neu-ghlen, as edd son dy chooilley eean neu-ghlen as eajee. 3Son ta dy chooilley ashoon er n’iu jeh feeyn pyshoonagh e maarderys, as ta reeaghyn y theihll er n’yannoo maarderys r’ee, as ta marchanyn y theihll er n’aase berchagh trooid mooadys yn rouanys eck. 4As cheayll mee coraa elley veih niau, gra, Tar-jee magh ass-jee, my phobble, nagh bee shiu sheshaghyn mâree ayns e peccaghyn, as nagh gow shiu ayrn jeh’n kerraghey dewil eck. 5Son ta e peccaghyn er roshtyn gys niau, as ta Jee er chooinaghtyn er y vee-chairys eck. 6Jean-jee ish y chooilleeney eer myr t’eeish er chooilleeney shiuish, as cur-jee dooble jee cordail rish ny obbraghyn eck; ayns y chappan t’ee er lhieeney, lhieen-jee wheesh elley j’ee. 7Corrym rish y stayd mooaralagh t’ee er ghoaill urree, as er vaghey ayns rouanys, yn corrymid cheddin dy cherraghey as dy heaghyn cur-jee urree: son t’ee gra ayns e cree, Ta mee my hoie my ven-reïn, as cha nee ben-treoghe mee, as cha jig trimshey erbee my raad. 8Shen-y-fa tuittee ny kerraghyn eck [urree] ayns un laa, baase, as dobberan, as gortey; as bee ee dy bollagh losht lesh aile: son niartal ta’n Chiarn Jee ta briwnys ee. 9As nee reeaghyn y theihll ta er n’yannoo maarderys, as er vaghey dy rouanagh mâree, keayney, as dobberan er e son, tra hee ad jaagh y lostey eck. 10Shassoo foddey jeh son aggle jeh’n torchagh eck, gra, Ah treih, treih, yn ard-valley mooar shen Babylon, yn ard-valley mooar lajer shen! son ayns un oor ta dty vriwnys er jeet. 11As nee marchanyn y theihll keayney as dobberan hrimshagh har’ee, son cha vel dooinney erbee kionnaghey yn varchantys eck arragh: 12Yn varchantys dy airh as dy argid, as dy chlaghyn costal, as pearlyn, as aanrit keyl, as purple, as sheeidey, as scarleod, as dy chooilley vonney dy fuygh millish, as dy chooilley horch dy hiyn ivory, as dy chooilley horch dy hiyn fuygh smoo costal, as dy phrash, as yiarn, as marble, 13As cinnamon, as spiceyn millish, as myrrh, as frankincense, as feeyn, as ooil, as flooyr meen, as curnaght, as ollagh, as kirree, as cabbil, as fainee, as slaveyn, as anmeenyn deiney. 14As ta ny messyn va yeearree dty chree orroo, er n’immeeaght voïd, as dy chooilley nhee va millish as mie, er n’immeeaght voïd, as t’ou rey roo son dy bragh. 15As nee marchanyn ny reddyn shoh, va jeant berchagh lioree, shassoo foddey jeh, son aggle roish y torchagh eck, keayney as dobberan, 16As gra, Treih, treih, yn ard-valley mooar shen, va coamrit ayns aanrit keyl, as purple, as scarleod, as soit magh dy stoamey lesh airh, as claghyn costal, as pearlyn! 17Son ayns un oor ta lheid y verchys vooar er lheïe ersooyl. As ren dy chooilley vainshter, as sheshaght lhuingey, as shiolteyryn, as ooilley ny va dellal er yn aarkey, shassoo foddey jeh, 18As dyllee ad tra honnick ad jaagh yn lostey eck, gra, Cre’n ard-valley ta casley rish yn ard-valley mooar shoh? 19As cheau ad joan er nyn ging, as deïe ad, lesh keayney as dobberan, gra, Ah treih, treih, yn ard-valley mooar shen, aynjee va jeant berchagh dy chooilley unnane va lhongyn oc er yn aarkey, liorish yn aght-baghee costyllagh eck! son ayns un oor t’ee er ny yannoo follym-faase. 20Bee-jee boggyssagh er-e-skyn, uss niau, as shiuish ostyllyn as phadeyryn casherick, son ta Jee er choyrt cooilleeney diu urree. 21As hrog ainle niartal clagh casley rish clagh vooar wyllin, as cheau eh eh ’sy cheayn, gra, Er yn aght shoh lesh niart breeoil vees yn ard-valley mooar shen Babylon er ny hilgey sheese, as cha bee ee arragh ry-gheddyn. 22As cha bee kiaull claaseyderyn, as fir-chiaullee, as piperyn, as fir-chayrnee, arragh er ny chlashtyn aynyd’s; as cha bee fir-cheirdey jeh keird erbee, arragh ry-gheddyn aynyd’s; as cha bee feiyr y chlagh-wyllin ny smoo er ny chlashtyn aynyd’s. 23As cha jean soilshey cainleagh arragh soilshean aynyd; as cha bee coraa yn dooinney-poosee ny yn ven-phoosee arragh edyr ry-chlashtyn aynyd: son va ny marchanyn ayd’s deiney mooarey’n theihll; son liorish dty obbeeys va dy chooilley ashoon er ny volley: 24As aynjee v’er ny gheddyn fuill phadeyryn, as nooghyn, as [yn uill] ocsyn ooilley v’er nyn ghunverys er y thalloo.