CAB. XIX

1Lurg ny reddyn shoh cheayll mee sheean mooar myr jeh mooarane pobble ayns niau, gra, Alleluia: Saualtys, as gloyr, as ooashley, as pooar dy row gys y Chiarn y Jee ain: 2Son kiart as cairagh ta e vriwnyssyn; son t’eh er vriwnys y streebagh vooar, hug y seihll er-shaghryn liorish y streebeeys eck, as t’eh er ghoaill cooilleeney veih ny laueyn eck son fuill e harvaantyn. 3As dooyrt ad reesht, Alleluia, as hrog yn jaagh eck seose son dy bragh as dy bragh. 4As huitt ny kiare shanstyryn as feed, as ny kiare cretooryn sheese as hug ad ooashley da Jee va soie er y stoyl-reeoil, gra, Amen; Alleluia. 5As haink coraa magh veih’n stoyl-reeoil, gra, Cur-jee moylley da’n Jee ain, ooilley shiuish e harvaantyn, as shiuish ta goaill aggle roish, chammah beg as mooar. 6As cheayll mee myr dy beagh eh sheean earroo mooar dy leih, as myr sheean ymmodee ushtaghyn, as myr feiyr taarnaghyn mooarey, gra, Alleluia; son ta’n Chiarn Jee ooilley-niartal reill. 7Lhig dooin ve gennal as boggey ’ghoaill, as ooashley y choyrt da; son ta poosey yn Eayn er jeet, as ta e ven-phoost er n’yannoo ee hene aarloo. 8As jeeish ve lowit dy ve coamrit lesh aanrit keyl, glen as gial: son ta’n aanrit keyl ynrickys ny nooghyn. 9As dooyrt eh rhym, Scrieu, Maynrey t’adsyn ta er nyn guirrey gys shibber-banshey yn Eayn. As dooyrt eh rhym, T’ad shoh raaghyn firrinagh Yee. 10As huitt mee ec e chassyn dy choyrt ooashley da: As dooyrt eh rhym, Jeeagh nagh jean oo eh: Ta mish dty heshey-harvaant, as jeh dty vraaraghyn ta feanish Yeesey oc: cur ooashley da Jee: son ta feanish Yeesey yn spyrryd dy adeyrys. 11As honnick mee niau foshlit as cur-my-ner, cabbyl bane: as va eshyn va markiagh er enmyssit Firrinagh as Ynrick, as ayns cairys t’eh briwnys as jannoo caggey. 12As va ny sooillyn echey myr lossey dy aile, as er e chione va ymmodee attaghyn; as va ennym echey scruit nagh row dooinney erbee dy hoiggal agh eh-hene: 13As v’eh coamrit lesh garmad thummit ayns fuill: as ta’n ennym echey, Goo Yee. 14As deiyr er sheshaghtyn-caggee niau, er cabbil baney, coamrit lesh aanrit keyl, gial as glen. 15As magh ass e veeal ta goll cliwe gyere dy woalley ny ashoonyn lesh: as nee eh reill ad lesh lorg yiarn: as t’eh stampey press-feeyney jeh dewilys as jymmoose Yee ooilley-niartal. 16As ta echey er e gharmad as er e lheeasid ennym scruit, REE DY REEAGHYN, AS CHIARN DY HIARNYN. 17As honnick mee ainle ny hassoo ayns y ghrian; as deïe eh lesh ard choraa, gra rish dy chooilley eean ta getlagh ayns mean yn aer, Tar-jee, as chaggil-jee shiu hene dy cheilley gys shibber yn Jee mooar; 18Dy vod shiu gee feill reeaghyn, as feill captanyn, as feill deiney niartal, as feill chabbil, as yn eill ocsyn ta markiagh orroo, as feill dy chooilley ghooinney, chammah seyr as shirveishee, chammah beg as mooar. 19As honnick mee yn veisht as reeaghyn y theihll, er nyn jaglym cooidjagh dy chaggey n’oï-syn va markiagh er y chabbyl, as noi e heshaght-chaggee. 20As va’n veisht goit, as marish yn phadeyr foalsey va gobbraghey mirrilyn ayns e euish, lhieu v’eh molley adsyn v’er ghoaill orroo cowrey’n veisht, as adsyn hug ooashley da e yalloo. V’ad shoh ny-neesht ceaut bio ayns logh dy aile lostey lesh brimstone. 21As va’n chooid elley jeu er ny varroo lesh y chliwe haink magh ass y veeal echeysyn va markiagh er y chabbyl; as va ooilley ny eeanlee er nyn lhieeney lesh yn eill oc.