CAB. II

1Gys ainle agglish Ephesus, scrieu, Ny reddyn shoh ta eshyn dy ghra ta cummal ny shiaght rollageyn ayns e laue yesh, ta shooyl mastey ny shiaght cainleyryn dy airh; 2Shione dou dty obbraghyn, as dty hooilleil, as dty hurranse, as kys nagh vod oo gymmyrkey lhieusyn ta olk: as t’ou er phrowal adsyn ta gra dy nee ostyllyn ad, agh cha vel ad; as er gheddyn ad magh dy ve nyn mreageryn: 3As t’ou er n’ymmyrkey yn errey, as ta ayd meenid, as er graih my ennym t’ou er hooilleil, as cha vel oo er choayl dty chree. 4Ny-yeih ta red ennagh aym dt’oï, er-yn-oyr dy vel oo er hreigeil dty chied ghraih. 5Cooinee er-y-fa shen cre voish t’ou er duittym, as gow arrys, as jean dty chied obbraghyn; er-nonney hig-ym hood dy tappee, as scugh-ym dty chainleyr ass e ynnyd, mannagh gow arrys. 6Agh ta’n goo shoh ayd, dy vel dwoaie ayd er obbraghyn ny Nicolaitanee, orroo ta dwoaie aym’s myrgeddin. 7Eshyn ta cleaysh echey, lhig da clashtyn cre ta’n Spyrryd dy ghra rish ny kialteenyn. Dasyn yiow yn varriaght ver-ym’s dy ee jeh billey yn vea, ta ayns mean paradise Yee. 8As gys ainle agglish Smyrna, scrieu, Ny reddyn shoh ta’n chied er as y fer s’jerree dy ghra, va marroo, as ta bio; 9Shione dou dty obbraghyn, as dty heaghyn, as dty voghtynid (agh t’ou berchagh,) as ta fys aym er yn oltooan ocsyn ta gra dy nee Hewnyn ad, as nagh vel, agh keeill y Drogh-spyrryd. 10Ny gow aggle roish veg jeh ny reddyn shen nee oo surranse: cur-my-ner, nee yn drogh-spyrryd paart eu y hilgey ayns pryssoon, dy vod shiu v’er nyn browal; as bee shiu fo tranlaase jeih laa: bee uss firrinagh gys y vaase, as ver-yms dhyt attey dy vea. 11Eshyn ta cleaysh echey, lhig eh clashtyn cre ta’n Spyrryd dy ghra rish ny kialteenyn, Cha vow eshyn ta geddyn y varriaght, aggair liorish y nah vaase. 12As gys ainle agglish Pergamos, scrieu, Ny reddyn shoh ta eshyn gra, echey ta’n cliwe gyere lesh daa foyr; 13Shione dou dty obbraghyn, as dty chummal, dy jarroo raad ta stoyl-reill Noid-ny-hanmey; as t’ou lhiantyn shickyr gys m’ennym, as cha vel oo er n’obbal my chredjue, eer ayns ny laghyn shen ayndoo va Antipas my eanish firrinagh, v’er ny choyrt dy baase nyn mast’ eu, raad ta’n Drogh-spyrryd cummal. 14Agh ta red ennagh aym dt’oï, er-yn-oyr dy vel ayd ayns shen adsyn ta lhiantyn gys coyrle Balaam, dynsee Balak dy hoiaghey ribbey roish cloan Israel, dy ee reddyn v’er ny ouralley gys jallooyn, as dy chur rish maarderys. 15Myr shen myrgeddin t’adsyn mayrt ta cummal credjue ny Nicolaitanee, red ta dwoaie aym er. 16Gow arrys; er-nonney hig-ym hood dy tappee; as nee’m caggey nyn ’oï oc lesh cliwe my veeal. 17Eshyn ta cleaysh echey, lhig eh clashtyn cre ta’n Spyrryd dy ghra rish ny kialteenyn. Dasyn ta geddyn yn varriaght ver-yms dy ee jeh’n manna follit, as ver-ym da clagh vane, as er y chlagh ennym noa scruit, nagh nione da dooinney erbee, agh eshyn ta dy gheddyn eh. 18As gys ainle agglish Thyatira, scrieu, Ny reddyn shoh ta Mac Yee dy ghra, ny sooillyn echey ta myr lossey dy aile, as e chassyn goll-rish prash sollys; 19Shione dou dt’obbraghyn, as dty ghiastyllys, as dty hirveish, as dty chredjue, as dty hurranse, as dt’obbraghyn s’jerree dy ve ny share na’n toshiaght. 20Ny-yeih, ta reddyn ennagh aym dy choyrt dty lieh, er-y-fa dy vel uss lhiggey da’n ven shen Jezebel, ta goaill urree dy ve ny adeyr, dy ynsaghey as dy chleayney my harvaantyn dy chur rish maarderys, as dy ghoaill commee ayns ny reddyn t’er ny ouralley gys jallooyn. 21As hug mee traa jee dy ghoaill arrys jeh’n vaarderys eck, as cha ren ee arrys y ghoaill. 22Cur-my-ner, tilg-yms ee er lhiabbee, as adsyn ta brishey poosey mâree ayns seaghyn trome, mannagh gow ad arrys jeh nyn obbraghyn. 23As stroie-ym yn chloan eck lesh baase; as bee fys ec ooilley ny kialteenyn dy nee mish eh ta ronsaghey ny meeaghyn as y cree: as ver-yms da dagh unnane eu cordail rish nyn obbraghyn. 24Agh riuish ta mee gra, as rish y vooinjer elley ta ayns Thyatira, Whilleen as nagh vel yn ynsagh shoh oc, as nagh vel er doiggal croutyn dowiney yn Drogh-spyrryd, myr jir ad, cha der-ym erriu errey erbee sodjey. 25Agh cum-jee shickyr shen ny t’eu hannah, derrey hig-ym. 26As eshyn ta geddyn y varriaght, as freayll my obbraghyn gys y jerrey dasyn ver-ym pooar harrish ny ashoonyn: 27(As nee eh reill ad lesh lorg-reill dy yiarn: as myr siyn craie bee ad brisht ayns peeshyn) myr ta mish myrgeddin er gheddyn veih my Ayr. 28As ver-ym dasyn rollage y voghrey. 29Eshyn ta cleaysh echey, lhig da clashtyn ny ta’n Spyrryd dy ghra rish ny kialteenyn.