CAB. XXII

1As yeeagh eh dou awin glen dy ushtey yn vea, sollys myr crystal, geill magh ass stoyl-reeoil Yee, as yn Eayn. 2Ayns mean y straid eck, as er dagh cheu jeh’n awin, va billey yn vea, va ceau daa cheint jeig dy vessyn, as ren gymmyrkey mess dy chooilley vee: as va duillagyn y villey son slaynt ny Hashoonyn. 3As cha bee mollaght arragh: agh bee stoyl-reeoil Yee, as yn Eayn aynjee: as nee e harvaantyn eshyn y hirveish. 4As hee ad yn eddin echey: as bee’n ennym echey scruit er glaare nyn eddinyn. 5As cha bee oie edyr ayns shen, as cha vel ad feme cainle, chamoo soilshey’n ghrian; son ta’n Chiarn Jee coyrt soilshey daue: as nee ad reill son dy bragh as dy bragh. 6As dooyrt eh rhym, Ta ny raaghyn shoh firrinagh as ynrick. As ta’n Chiarn Jee jeh ny phadeyryn casherick er choyrt e ainle dy hoilshaghey da e harvaantyn ny reddyn shegin dy gerrit v’er nyn gooilleeney. 7Cur-my-ner, ta mee cheet dy tappee: bannit ta eshyn ta freayll raaghyn phadeyrys y lioar shoh. 8As honnick mish Ean ny reddyn shoh, as cheayll mee ad. As erreish dou ve er chlashtyn as er vakin, huitt mee sheese dy chur ooashley ec cassyn yn ainle, hoilshee ny reddyn shoh dou. 9Eisht dooyrt eh rhym, Jeeagh nagh jean oo: son ta mish dty heshey-harvaant, as jeh dty vraaraghyn ny phadeyryn, as jeusyn ta freayll raaghyn y lioar shoh: cur ooashley da Jee. 10As dooyrt eh rhym, Ny seal raaghyn phadeyrys y lioar shoh: son ta’n traa er-gerrey. 11Lhig dasyn ta neu-chairagh, ve dy kinjagh neu-chairagh: as lhig dasyn ta neu-ghlen, ve kinjagh neu-ghlen: as lhig dasyn ta cairagh, ve kinjagh cairagh: as lhig dasyn ta casherick, ve kinjagh casherick. 12As cur-my-ner, ta mee cheet dy tappee; as ta my leagh mârym, dy choyrt da dy chooilley ghooinney cordail rish e obbraghyn. 13Mish Alpha as Omega, yn toshiaght as y jerrey, yn chied er as y fer s’jerree. 14Bannit t’adsyn ta cooilleeney e annaghyn, dy vod cairys ve oc gys billey yn vea, as dy vod ad goll stiagh er ny giattyn gys yn ard-valley. 15Son cheu-mooie ta moddee, as fir-obbee, as maarderee, as dunveryn, as adsyn ta cur ooashley da jallooyn, as quoi-erbee shynney lesh as ta jannoo breg. 16Ta mish Yeesey er choyrt my ainle dy ve feanish diu jeh ny reddyn shoh ayns ny kialteenyn. Mish fraue as sluight Ghavid, as rollage sollys y voghrey. 17As ta’n Spyrryd as ben y phoosee gra, Tar-jee. As lhig dasyn ta clashtyn, gra, Tar-jee. As lhig dasyn ta paagh cheet: As lhig da quoi-erbee saillish goaill ushtey yn vea nastee. 18Son ta mee gymmyrkey feanish gys dy chooilley ghooinney ta clashtyn goan phadeyrys yn lioar shoh, My nee dooinney erbee cur veg smoo gys ny reddyn shoh, ver Jee ersyn ny briwnyssyn trome ta scruit ayns y lioar shoh: 19As my ghoys dooinney erbee veg ersooyl veih goan lioar y phadeyrys shoh, gowee Jee ersooyl yn ayrn echeysyn ass lioar y vea, as ass yn ard-valley casherick, as veih ny reddyn ta scruit ’sy lioar shoh. 20T’eshyn ta gymmyrkey feanish gys ny reddyn shoh, gra, Dy firrinagh ta mee cheet dy tappee. Amen. Eer myr shoh, tar, Hiarn Yeesey. 21Grayse nyn Jiarn Yeesey Creest dy row mêriu ooilley. Amen.

YN JERREY.