CAB. III

1As gys ainle yn agglish t’ayns Sardis, scrieu, Ny reddyn shoh t’eshyn gra, echey ta ny shiaght Spyrrydyn dy Yee, as ny shiaght rollageyn; Shione dou dty obbraghyn, dy vel goo ayd dy vel oo bio, agh t’ou marroo. 2Bee er dty arrey, as niartee ny reddyn ta er-mayrn, ta aarloo dy gholl naardey: son cha vel mee er gheddyn dty obbraghyn dy slane cooilleenit fenish Yee. 3Cooinee, er-y-fa shen, kys t’ou er gheddyn as er chlashtyn, as cum shickyr, as gow arrys. Mannagh bee oo er-y-fa shen er dty arrey, hig-ym ort myr maarliagh, as cha bee fys ayd cre’n oor hig-ym ort. 4Ta regyryn dy enmyn ayd ayns Sardis hene, nagh vel er sollaghey nyn gharmadyn; as nee ad shooyl mârym’s ayns coamraghyn gial: son t’ad feeu. 5Bee eshyn yiow yn varriaght, coamrit ayns garmad gial; as cha der-ym yn ennym echey ass lioar y vea, agh goym rish e ennym kiongoyrt rish my Ayr, as fenish e ainleyn. 6Eshyn ta cleaysh echey, lhig eh clashtyn ny ta’n Spyrryd dy ghra rish ny kialteenyn. 7As gys ainle agglish Philadelphia, scrieu, Ny reddyn shoh ta’n fer casherick, yn er firrinagh dy ghra, eshyn ta ogher Ghavid echey, eshyn ta fosley, as cha vel dooinney erbee jeigh; as ta jeigh, as cha vel fer erbee fosley: 8Shione dou dty obbraghyn: cur-my-ner, ta mee er hoiaghey royd dorrys foshlit, as cha vod dooinney y yeigh eh: son ta red beg dy vree aynyd, as t’ou er vreayll my ghoo, as cha vel oo er obbal my ennym. 9Cur-my-ner, ver-ym orroosyn jeh keeill Satan (ta gra dy nee Hewnyn ad, as nagh nee, agh ta breagagh) cur-my-ner, ver-yms orroo cheet as ooashley ’choyrt ec dty chassyn, as toiggal dy vel mish er ve graihagh ort. 10Er-yn-oyr dy vel oo er vreayll goo my hurranse, freill-yms uss myrgeddin veih’n oor dy hrial, ta ry-hoi cheet er ooilley’n seihll, dy phrowal adsyn ta baghey er y thalloo. 11Cur-my-ner, ta mee cheet dy tappee: cum shickyr ny t’ayd, son nagh gow dooinney erbee dty attey voïd. 12Eshyn ta cosney’n varriaght, neem’s pillar jeh ayns chiamble Yee, as cha jed eh magh ass arragh: as scrieu-yms er ennym my Yee, as ennym ard-valley my Yee, yn Jerusalem noa, ta cheet neose veih niau voish my Yee; as scrieu-yms er my ennym noa. 13Eshyn ta cleaysh echey, lhig eh clashtyn ny ta’n Spyrryd dy ghra rish ny kialteenyn. 14As gys ainle agglish ny Laodiceanee, scrieu, Ny reddyn shoh ta’n Amen dy ghra, yn feanish ynrick as firrinagh, toshiaght chroo Yee; 15Shione dou dty obbraghyn, nagh vel oo edyr feayr ny cheh: baillym dy beagh oo edyr feayr ny cheh. 16Myr shen er-yn-oyr dy vel oo eddyr y jees, as nagh vel oo edyr feayr ny cheh, tilg-ym oo magh ass my veeal: 17Son dy vel oo gra, Ta mee berchagh, as er vishaghey ayns cooid, as nagh vel mee feme nhee erbee; as cha vel oo goaill hood hene dy vel oo treih, as seaghnit, as boght, as doal, as rooisht. 18Ta mee cur coyrle dhyt dy chionnaghey voym airh er ny phrowal ’syn aile, dy vod oo ve berchagh; as coamrey gial, dy vod oo ve coodit, as nagh bee dty nearey er ny akin; as jean dty hooillyn y ooilaghey lesh shelliu-sooilley, dy vod oo fakin. 19Whilleen as ta mee graihagh orroo, ta mee cur oghsan daue, as dy smaghtaghey ad: bee jeean er-y-fa shen, as gow arrys. 20Cur-my-ner, ta mee my hassoo ec y dorrys, as shirrey fosley: My ver dooinney erbee clashtyn da my choraa, as y dorrys y osley, hig-ym stiagh huggey, as nee’m shibber y ghoaill mârish, as eshyn mârym’s. 21Dasyn ta geddyn y varriaght low-yms dy hoie mârym er my stoyl-reeoil, myr hooar mish myrgeddin yn varriaght, as ta mee er hoie sheese marish my Ayr er y stoyl-reeoil echeysyn. 22Eshyn ta cleaysh echey, lhig eh clashtyn ny ta’n Spyrryd dy ghra rish ny kialteenyn.