CAB. VI

1As honnick mee, tra doshil yn Eayn yn chied seal as cheayll mee, myr feiyr taarnagh, fer jeh ny kiare cretooryn, gra, Tar, as cur-my-ner. 2As yeeagh mee, as cur-my-ner, cabbyl bane; as va bow echeysyn va ny hoie er, as va attey er ny choyrt da, as hie eh magh lesh barriaght, as dy gheddyn barriaght. 3As tra v’eh er vosley yn nah seal, cheayll mee yn nah chretoor gra, Tar, as cur-my-ner. 4As hie magh cabbyl elley va jiarg; as va pooar er ny choyrt dasyn va ny hoie er, dy ghoaill shee ersooyl voish y thalloo, as dy jinnagh yn derrey yeh coyrt yn jeh elley dy baase: as va cliwe mooar er ny choyrt da. 5As tra v’eh er vosley yn trass seal, cheayll mee yn trass chretoor gra, Tar, as cur-my-ner. As yeeagh mee, as honnick mee cabbyl doo; as v’echeysyn va markiagh er piyr dy veihaghyn ayns e laue. 6As cheayll mee coraa veih mastey ny kiare cretooryn, gra, Towse dy churnaght son ping, as three towseyn dy oarn son ping; as ny jean aggair da’n ooil as y feeyn. 7As tra v’eh er vosley yn chiarroo seal, cheayll mee coraa yn chiarroo chretoor gra, Tar, as cur-my-ner. 8As yeeagh mee, as cur-my-ner, cabbyl banee; as va ennym yn varkiagh v’er, yn Baase, as yn oaie geiyrt er: as va pooar currit daue harrish y chiarroo ayrn jeh’n thalloo, dy varroo lesh y chliwe, as lesh gortey, as lesh baase, as lesh beïyn feïe y thallooin. 9As tra v’eh er vosley yn wheiggoo seal, honnick mee fo’n altar ny anmeenyn ocsyn v’er ny choyrt dy baase son goo Yee, as son yn eanish dymmyrk ad. 10As deïe ad lesh ard-choraa, gra, Caïd, O Hiarn, casherick as firrinagh, nagh vel uss briwnys as goaill cooilleeney son yn uill ain er fir-vaghee yn thallooin? 11As va coamraghyn gial er ny choyrt da dagh unnane oc, as ve er ny ghra roo, dy row ad dy ghoaill fea foast son tammylt, derrey veagh traa nyn sheshaghyn-sharvaant myrgeddin, as nyn mraaraghyn va dy hurranse baase myr ren adsyn, cooilleenit. 12As honnick mee tra doshil eh yn cheyoo seal, as cur-my-ner, va craa mooar thallooin ayn, as haink y ghrian dy ve doo myr aanrit-sack geyshteenagh, as va’n eayst myr fuill: 13As huitt rollageyn yn aer gys y thalloo, myr ta billey-figgagh tilgey e vess neu-chooie, tra te criht lesh geay niartal: 14As hie’n aer ass shilley myr duillag lioar ta fillit; as va dy chooilley lieau as ellan scughit ass nyn undin: 15As ren reeaghyn y thallooin, as ny ard-gheiney, as ny berchee, as ny ard-chaptanyn, as ny deiney pooaral, as dy chooilley ghooinney ayns bondiaght, as ooilley ayns seyrsnys, ad-hene y ollaghey ayns ooigyn, as fo creggyn ny sleityn. 16As dooyrt ad rish ny sleityn as ny creggyn, Tuitt-jee orrin, as follee shin veih’n eddin echeysyn ta ny hoie er y stoyl-reeoil, as veih corree yn Eayn: 17Son ta laa mooar e yymmoose er jeet, as quoi oddys shassoo?