CAB. VIII

1As tra v’eh er vosley yn chiaghtoo seal, cha row fockle dy chlashtyn ayns niau mysh lieh oor. 2As honnick mee ny shiaght ainleyn va nyn shassoo kiongoyrt rish Jee; as dauesyn v’er ny choyrt shiaght cayrnyn. 3As haink ainle elley as hass eh ec yn altar, as plate airh echey; as va er ny choyrt da mooarane dy oural-millish, dy jinnagh eh shen y hebbal marish padjeryn ooilley ny nooghyn er yn altar dy airh, va kiongoyrt rish y stoyl-reeoil. 4As hie bree yn oural-millish marish padjeryn ny nooghyn, seose kiongoyrt rish Jee, veih laue yn ainle. 5As ghow yn ainle y censer, as lhieen eh eh lesh aile veih’n altar, as hilg eh eh er y thalloo: as va coraaghyn [agglagh,] as taarnaghyn, as tendreilyn, as craa-hallooin. 6As ren ny shiaght ainleyn, oc va ny shiaght cayrnyn, kiartaghey ad-hene dy heidey. 7Heid y chied ainle, as haink claghyn-sniaghtee as aile lesh fuill ny chione, as v’ad er nyn gheayrtey er y thalloo: as va’n trass ayrn jeh ny biljyn losht, as va ooilley yn faiyr glass losht. 8As heid yn nah ainle, as va myr dy beagh slieau mooar lostey lesh aile tilgit ’syn aarkey; as haink y trass ayrn jeh’n aarkey dy ve fuill: 9As hooar yn trass ayrn jeh ny cretooryn va bio ayns yn aarkey, baase; as va’n trass ayrn jeh ny lhongyn er nyn stroie. 10As heid y trass ainle, as huitt rollage vooar veih niau, lostey myr dy beagh eh lamp, as huitt eh er y trass ayrn jeh ny awinyn, as er farraneyn ny hushtaghyn: 11As ta ennym y rollage enmyssit Ullymar: as haink y trass ayrn jeh ny ushtaghyn dy ve myr ullymar; as hooar ymmodee sleih baase liorish ny ushtaghyn, er-yn-oyr dy row ad sharroo. 12As heid y chiarroo ainle, as va’n trass ayrn jeh’n ghrian fo dorraghys, as y trass ayrn jeh’n eayst, as y trass ayrn jeh ny rollageyn; ayns wheesh as dy row yn trass ayrn jeu fo dorraghys, as cha daink y laa rish son y trass ayrn jeh, as yn oie myrgeddin. 13As yeeagh mee, as cheayll mee ainle getlagh trooid mean niau, gra lesh ard-choraa, Smerg, smerg, smerg da cummaltee ny hooirey, er coontey feiyr cayrnyn elley ny three ainleyn ta foast ry-hoi sheidey.