CAB. IX

1As heid yn wheiggoo ainle, as honnick mee rollage tuittym veih niau gys y thalloo: as dasyn v’er ny choyrt ogher yn diunid gyn-grunt. 2As doshil eh yn diunid gyn-grunt, as dirree jaagh ass y diunid myr jaagh coirrey; as va’n ghrian as yn aer ayns dorraghys, kyndagh rish jaagh y diunid. 3As haink ass y jaagh locustyn er y thalloo; as dauesyn va pooar er ny choyrt, myr ta pooar ec scorpionee y thallooin. 4As v’ad fo harey gyn skielley y yannoo da faiyr y thallooin, ny da red glass erbee, ny billey erbee; agh da ny deiney shen ny-lomarcan, nagh row cowrey Yee oc ayns glaare nyn eddin. 5As dauesyn ve er ny choyrt gyn dy varroo ad, agh dy beagh ad er nyn dorchaghey queig meeghyn: as va’n torchagh oc myr torchagh scorpion, tra ta dooinney guint liorish. 6As ayns ny laghyn shen, nee deiney shirrey baase, as cha vow ad eh; as bee ad aignagh baase y gheddyn, as nee’n baase chea voue. 7As va cummey ny locustyn goll-rish cabbyl greït son y chaggey; as er nyn ging va attaghyn goll-rish airh, as va ny eddinyn oc goll-rish eddinyn deiney. 8As va folt oc goll-rish folt mraane, as va nyn veeacklyn goll-rish feeacklyn lionyn. 9As va oc eilley-vroggil myr yiarn; as va sheean nyn skianyn myr feiyr fainee ymmodee cabbil roie gys y chaggey. 10As va farbyllyn orroo myr scorpionee, as va gah ayns nyn arbyl: as va pooar oc dy ghortaghey deiney queig meeghyn. 11As va oc ree harrystoo, ainle y diunid gyn-grunt, ta’n ennym echey ayns glare ny Hebrewnee Abaddon, agh ayns glare ny Grecianee ta e ennym Apollyon. 12Ta’n chied cherraghey trome harrish, as cur-my-ner, ta daa cherraghey trome elley dy heet ny lurg oc shoh. 13As heid yn cheyoo ainle, as cheayll mee coraa veih kiare corneilyn yn altar airhey, ta kiongoyrt rish Jee, 14Gra rish y cheyoo ainle echey va’n cayrn, Feayshil ny kiare ainleyn ta kianlt ayns awin vooar Euphrates. 15As va ny kiare ainleyn er nyn veaysley, va kiarit son oor, as laa, as mee, as bleïn, dy stroie yn trass ayrn jeh sheelnaue. 16As va earroo sheshaght-caggee ny markee daa cheead thousane dy housaneyn: as cheayll mee yn earroo oc. 17As myr shoh honnick mee ny cabbil ayns yn ashlish, as adsyn v’er nyn mooin, va eilley-vroggil orroo myr aile, as myr hyacinth, as myr brimstone: as va king ny cabbil myr king lionyn; as ass nyn meeal haink aile, as jaagh, as brimstone. 18Lioroo shoh nyn droor va’n trass ayrn dy gheiney er ny stroie, liorish yn aile, as liorish y jaagh, as liorish y brimstone, haink ass nyn meeal. 19Son ta’n phooar oc ayns nyn meeal, as ayns nyn arbyl: son va ny farbyllyn oc goll-rish ard-nieughyn, as va king oc, as lioroo t’ad jannoo skielley. 20As y chooid elley jeh ny deiney nagh row er nyn stroie liorish ny kerraghyn agglagh shoh, cha ghow ad foast arrys son obbraghyn nyn laueyn, ayns gyn coyrt ooashley da jouyil, as jallooyn dy airh, dy argid, as prash, as clagh, as fuygh: nagh vod fakin, ny clashtyn, ny shooyl: 21Chamoo ghow ad arrys jeh’n dunverys oc, ny jeh’n obbeeys oc, ny jeh nyn maarderys, ny jeh nyn maarlys.