CAB. X

1Vraaraghyn, yeearree my chree as my phadjer gys Jee son Israel te, dy voddagh ad ve er nyn sauail. 2Son ta mee gymmyrkey feanish daue, dy vel graih jeean oc er Jee, agh cha nee cordail rish tushtey (firrinagh). 3Son mee-hushtagh jeh cairys Yee, as shirrey dy hoiaghey seose yn chairys oc hene, cha vel ad er injillaghey ad-hene gys cairys Yee. 4Son ta Creest jerrey yn leigh son cairys, da dy chooilley unnane ta credjal. 5Son ta Moses soiaghey roïn yn chairys ta liorish y leigh, Dy bee yn dooinney ta cooilleeney ny reddyn shen, bio lioroo. 6Agh ta’n chairys ta liorish credjue, loayrt er yn aght shoh, Ny abbyr ayns dty chree, Quoi hed seose gys niau? (ta shen, dy chur lesh Creest neose) 7Ny, Quoi hed sheese gys y diunid? (ta shen, dy chur lesh Creest seose reesht veih ny merriu) 8Agh cre te gra? Ta’n goo er-gerrey dhyt, dy jarroo ayns dty veeal, as ayns dty chree; ta shen goo yn chredjue ta shin dy phreacheil; 9My nee oo lesh dty veeal goaill-rish yn Chiarn Yeesey, as credjal ayns dty chree dy vel Jee er hroggal eh veih ny merriu, bee oo er dty hauail. 10Son lesh y chree ta dooinney credjal gys cairys, as lesh y veeal ta goaill rish [y chredjue] er ny yannoo gys saualtys. 11Son ta’n scriptyr gra, Quoi-erbee ta credjal ersyn, nagh bee eh er ny choyrt gys nearey. 12Son cha vel veg y soiagh eddyr yn Hew as y Greek; son ta’n Chiarn cheddin harrish ooilley, berchagh dauesyn ooilley ta geamagh er. 13Son quoi-erbee nee geamagh er Ennym y Chiarn, bee eh er ny hauail. 14Kys eisht nee ad geamagh ersyn, nagh vel ad er chredjal ayn? As kys nee ad credjal aynsyn, nagh vel ad er chlashtyn jeh? As kys nee ad clashtyn fegooish preachoor? 15As kys nee ad preacheil, mannagh vel ad er nyn goyrt? Myr te scruit, Cre cha aalin ta ny cassyn ocsyn ta preacheil y sushtal dy hee, as cur lhieu naightyn gennal dy nheeghyn mie! 16Agh cha vel ad ooilley er choyrt biallys da’n sushtal: Son ta Esaias gra, Hiarn, quoi ta er chredjal y goo ain? 17Myr shen eisht, ta credjue cheet liorish clashtyn, as clashtyn liorish goo Yee. 18Agh ta mish dy ghra, Nagh vel adsyn er chlashtyn? Ta dy feer, hie yn coraa oc er feaï-ny-cruinney, as ny goan oc gys ny ardjyn sodjey magh jeh’n theihll. 19Agh ta mish gra, Row shoh gyn-yss da Israel? Ta Moses roïe er ghra, Nee’m shiu y ghreinnaghey gys eadaghey lioroosyn nagh nee pobble ad, as liorish ashoon ommijagh ver-ym corree erriu. 20Agh ta Esaias lesh dunnallys smoo gra, Va mee er my gheddyn lioroosyn nagh row dy my hirrey; Va mee er my hoilshaghey dauesyn nagh ren briaght my lurg. 21Agh rish Israel t’eh gra, Fey-ny-laa ta mee er heeyney magh my laueyn gys pobble roonagh as mee-viallagh.