CAB. XI

1Ta mee gra eisht, Vel Jee er hilgey jeh e phobble hene? Ny lhig eh Jee. Son ta mee hene myrgeddin my Israelite jeh sluight Abraham, jeh sheeloghe Venjamin. 2Cha vel Jee er hilgey jeh e phobble hene bione da ro-laue. Nagh vel fys eu cre ta’n scriptyr dy ghra mychione Elias? kys t’eh jannoo accan gys Jee noi Israel, gra, 3Hiarn, t’ad er varroo dty adeyryn, as er chleiy fo dt’altaryn; as ta mish faagit my-lomarcan, as t’ad shêgin er my vioys. 4Agh cre ta ansoor Yee dy ghra rish? Ta mee er vreayll my chour hene shiaght thousaneyn dy gheiney, nagh vel er lhoobey’n ghlioon gys Baal. 5Dy jarroo myr shen ec yn eer traa shoh myrgeddin ta fooilliagh ayn cordail rish y conaant dy ghrayse. 6As my she liorish grayse, cha vel eh ny sodjey liorish obbraghyn: er aght elley cha vel grayse ny sodjey grayse. Agh my te liorish obbraghyn, eisht cha vel eh ny sodjey grayse: er aght elley cha vel obbyr jeh veg y vree. 7Cre eisht? Cha vel Israel er roshtyn gys shen v’eh shirrey er y hon; agh ta’n fooilliagh reiht er chosney eh, as va’n chooid elley er nyn greoghey: 8Myr te scruit, Ta Jee er choyrt daue spyrryd dy saveenys, sooillyn nagh jinnagh ad fakin, as cleayshyn nagh jinnagh ad clashtyn, gys y laa shoh. 9As ta David gra, Lhig da’n boayrd oc v’er ny yannoo ny ribbey, as trap, as scammylt, as kerraghey daue. 10Lhig da ny sooillyn oc ve er ny gholley, nagh jean ad fakin, as jean uss dy kinjagh yn dreeym oc y chroymmey sheese. 11Ta mee gra eisht, Vel ad er snapperal dy duittagh ad? Ny lhig eh Jee: agh liorish yn tuittym ocsyn ta saualtys er jeet gys ny Ashoonee, dy ghreinnaghey ad gys eadolys. 12Nish, my ta’n tuittym ocsyn berchys y theihll, as y coayl oc cosney ny Hashoonee; cre-woad smoo vees yn slane cheet stiagh oc [gys y chredjue]? 13Son ta mee loayrt riuish, Ashoonee, ayns wheesh as dy vel mee ostyl ny Hashoonee, ta mee moylley my oik: 14My she shen dy voddym liorish saase erbee greinnaghey adsyn ta m’eill hene, dy heet stiagh gys y chredjue, as paart jeu y hauail. 15Son my she liorish tilgey adsyn jeh, va Ashoonee yn theihll goit gys foayr; cre vees yn goaill stiagh oc reesht, agh bioys veih ny merriu? 16Nish my ta’n chied-vess casherick, ta’n slane myrgeddin casherick: as my ta’n fraue casherick, myr shen ta ny banglaneyn. 17As my ta paart jeh ny banglaneyn brisht jeh, as uss veih billey-olive ny keylley, soit stiagh ny-vud oc, as goaill ayrn mâroosyn jeh’n fraue as soo yn villey-olive; 18Ny jean uss oo hene y ymmyrkey dy mooaralagh noi ny banglaneyn: agh my t’ou boggyssagh, cha vel oo gymmyrkey yn fraue, agh y fraue uss. 19Jir oo eisht, Va ny banglaneyn brisht jeh, dy voddin ve soit stiagh ayn. 20S’feer eh; v’adsyn brisht jeh kyndagh rish mee-chredjue, as t’ou uss dy hassoo liorish credjue. Ny bee ard-aignagh, agh gow aggle. 21Son mannagh ren Jee sparail ny banglaneyn dooghyssagh, bee er dty hwoaie er-aggle myrgeddin nagh lhig eh lhiat’s. 22Cur-my-ner er-y-fa shen mieys as briwnys gyere Yee: orroosyn ren tuittym, briwnys gyere; agh ort’s, mieys, my t’ou tannaghtyn ayns e vieys: er aght elley bee uss myrgeddin giarit jeh. 23As bee adsyn myrgeddin, mannagh vel ad dy kinjagh tannaghtyn ayns mee-chredjue, er nyn soiaghey stiagh: son ta Jee abyl dy hoiaghey ad stiagh reesht. 24Son my v’ou uss giarit jeh veih’n villey-olive ta feïe liorish dooghys, as oo soit stiagh noi dooghys ayns y villey-olive kenjal; cre-woad smoo vees ad shoh ta nyn manglaneyn dooghyssagh, soit stiagh ayns y villey-olive oc hene? 25Son cha baillym, vraaraghyn, dy beagh shiu mee-hushtagh jeh’n folliaght shoh, (er-aggle dy beagh shiu creeney ayns ny smooinaghtyn ard eu hene) dy vel dellid er daghyrt da Israel ayns ayrn, derrey hig slane corp ny Hashoonee stiagh. 26As myr shen bee ooilley Israel er nyn sauail: myr te scruit, Hig saualtagh ass Sion, as chyndaa-ee eh ersooyl mee-chraueeaght voish Jacob. 27As shoh my chonaant roosyn, tra ghoym ersooyl ooilley nyn beccaghyn. 28As mychione y sushtal, she noidyn ad er y ghraih euish: agh liorish dy row ad reiht, ta graih er ny choyrt daue er coontey nyn ayraghyn. 29Son ta giootyn graysoil as eam Yee gyn caghlaa. 30Son myr nagh vel shiuish ayns y traa t’er n’gholl shaghey er choyrt biallys da Jee, ta shiu nish er chosney myghin trooid y vee-viallys ocsyn: 31Dy jarroo myr shen cha vel ad shoh nish er choyrt biallys, dy vod adsyn neesht trooid y vyghin er ny hoilshaghey diuish myghin y gheddyn. 32Son ta Jee er yeigh ad seose ooilley cooidjagh fo mee-viallys dy voddagh eh myghin y hoilshaghey er ooilley. 33O diunid y verchys chammah jeh creenaght as tushtey Yee! cre cha follit ta ny briwnyssyn echey, as e raaidyn erskyn nyn roshtyn! 34Son quoi t’er hoiggal aigney’n Chiarn, ny quoi t’er ny ve yn coyrleyder echey? 35Ny quoi ta hoshiaght er choyrt da, as bee eh er ny chooilleeney da reesht? 36Son veihsyn, as ny hrooidsyn, as dasyn ta dy chooilley nhee: huggey dy row gloyr son dy bragh. Amen.